Ուրբաթ, 24 Հունիսի 2016 04:38

 Վրաստանին այսօր բոլորովին ձեռնտու չէ ՆԱՏՕ-ին անդամակցումը: Լրագրողների հետ հանդիպմանն այդպիսի կարծիք է հայտնել Վրաստանի խորհրդարանի նախկին խոսնակ, «Ժողովրդավարական շարժում-Միացյալ Վրաստան» կուսակցության առաջնորդ Նինո Բուրջանաձեն:

 

«Ես կարծում եմ, որ այսօր մեզ ՆԱՏՕ-ի բազաներ հարկավոր չեն: Շատերն ինձ  մեղադրում են այն բանի համար, որ տաս տարի առաջ ես միանգամայն հակառակն  էի ասում, բայց այն ժամանակ աշխարհաքաղաքական իրավիճակը բոլորովին այլ էր, աշխարհն այլ էր այլ: Այն ժամանակ մեզ համար ձեռնտու էր անդամակցել Հյուսիսատլանտյան դաշինքին, և մենք դրա բոլոր հնարավորություններն ունեինք: Իսկ այսօր իրավիճակն այլ է, 2008 թվականից հետո, երբ մեր տարածքում ռուսական բազաներ կան», - նշել է ժողովրդավարական շարժման առաջնորդը:

 

Բուրջանաձեն հարց է տվել, թե ով Վրաստանին կընդունի ՆԱՏՕ` ռուսական տանկերով: Նրա ասելով, եթե Վրաստանին ՆԱՏՕ ընդունելու հարց ծագի, ապա պաշատոնական Թբիլիսին ստիպված է լինելու հրաժարվել իր տարածքներից` Աբխազիայից և Հարավային Օսիայից, քանի որ ռուսական տանկերով նրան ոչ ոք այնտեղ չի թողնի:

 

«Այսօր դա մեզ ձեռնտու չէ նաև այն պատճառով, որ Ռուսաստանն այսօր շատ ավելի հզոր է, քան` 10 տարի առաջ: Եվ, ի դեպ, դա լիովին պարոն Պուտինի վաստակն է, որ Ռուսաստանը, վերջապես, ոտքի կանգնեց ծնկած վիճակից: Կարծում եմ, որ գրգռել հզոր հարևանին, որը հստակ շահեր ունի այս տարածաշրջանում, իհարկե, չարժե: Ես, ընդհանրապես, կարծում եմ, որ չի կարելի սեփական անվտանգությունը կառուցել այլ, նույնիսկ, փոքր պետությունների  հաշվին, էլ չեմ խոսում միջուկային զենք ունեցող գերտերությունների մասին», - հայտարարել է Բուրջանաձեն:

 

Ընդդիմադիր պատգամավորի համոզմամբ, այսօր Վրաստանը պետք է անի ամեն ինչ, որպեսզի միջազգային հանրության առջև ներկայանա որպես խաղաղ, անվտանգ, հուսալի գործընկեր, որից վտանգ չի բխում: Նա նաև կարծում է, որ Վրաստանը պետք է ուղիղ երկխոսություն վարի Ռուսաստանի հետ:

 

«Հարկավոր է խոսել բոլորի հետ, հատկապես` նրանց, ում հետ խնդիրներ ունես: Ուստի ճիշտ չեմ համարում այն հայտարարությունները, որ եթե Ռուսաստանի հետ երկխոսություն վարենք,  ապա նա չի վերադարձնի մեր տարածքները: Իսկ ինչ է, եթե չվարենք, ապա կվերադարձնի՟: Դա քաղաքական կոնյունկտուրա է, դա թրենդ է, որն ստեղծել է Սահակաշվիլին, և որը ոչ պաշտոնապես պաշտպանում են արևմտյան որոշ շրջանակներ` Ռուսաստանի հետ լարված հարաբերությունները պահպանելու համար: Խոսել Ռուսաստանի հետ` բնավ չի նշանակում լինել նրա վասալը: Նա նաև կարծում է, որ Վրաստանում բազմաթիվ մարդիկ նույն կարծիքի են: Սակայն, քանի որ ես այդ ամենը հայտարարում են բացահայտ և ուղիղ, ինձ մեղադրում են ռուսամետ տրամադրությունների համար, թեև ես բացարձակապես համաձայն չեմ նման պնդումներին», - ընգծել է ընդդիմադիր գործիչը:

 

Միևնույն ժամանակ, պատասխանելով այն հարցին, թե արդյոք Աբխազիայի և Հարավային Օսիայի անկախության ճանաչման համար հիմք է 2008 թվականին Հարավային Օսիայի զինված հակամարտության ժամանակ արգելված զենքի կիրառումը` Վրաստանի նախկին նախագահ Միխայիլ Սահակաշվիլիի կողմից, Բուրջանաձեն ընդգծել է, որ այդ գործողությունները հիմք չեն Աբխազիայի և Հարավային Օսիայի անկախությունը ճանաչելու համար: Նրա ասելով, դրա համար անհրաժեշտ են մի շարք պայմաններ: Նա հիշեցրել է, որ հայտնի իրադարձությունների ժամանակ Հարավային Օսիայում և Աբխազիայում ապրող բնակչության մեծ մասը տեղահանվել է:

 

«Իմ դիրքորոշումն այսպիսին է. եկեք վերադարձնենք բոլոր փախստականներին, որոնք այնտեղ ապրում էին և բռնության միջոով տեղահանվել են: Անցկացնենք հանրաքվե, և, եթե այն ժամանակ էլ բոլորը քվեարկեն Վրաստանից անջատվելու օգտին, դա կլինի օրինական քայլ: Իհարկել ինձ համար, ամեն դեպքում, դա կլինի անընդունելի և տհաճ, սակայն ես դրա հետ կհաշտվեմ: Սակայն այն պայմաններում, երբ այդ տարածքից բնակչության մեծ մասը տեղահանվել է, ոչ մի արդար որոշման մասին խոսք լինել չի կարող: Ասվածը, սակայն, չի նշանակում, որ մենք չպետք է խոսենք այդ միավորումների փաստացի առաջնորդների հետ` որքան էլ դա ծանր թվա: Երբ ես իշխանության գամ, ուղիղ երկխոսություն կսկսեմ, անպայման կգտնեմ երկխոսության հնարավորություն», - հայտարարել է Բուրջանաձեն:

 

Ընդդիմադիր քաղաքական գործիչը նաև կարծում է, որ Սահակաշվիլին Վրաստանը ներքաշեց պարտվողական պատերազմի մեջ, և դա հենց սկզբից ակնհայտ էր: Բուրջանաձեն ընդգծել է, որ կձգտի հասնել այն բանին, որպեսզի Սահակաշվիլին պատասխանատվության ենթարկվի 2008 թվականի օգոստոսի պատերազմի համար, որոոովհետև, քանի դեռ դա չի արվել, Վրաստանը բարոյական իրավունք չունի խոսելու աբխազների և օսերի հետ: Ավելի վաղ Բուրջանաձեն հայտարարել էր, թե Սահակաշվիլին արգելված զենքից ռմբակոծել է քնած Ցխինվալը, ինչի մասին վկայում է նաև Հայդի Տալյավինիի հանձնախմբի զեկույցը:

 

Լրագրողների այցը Վրաստան կազմակերպել էին Go Group Media-ն և JAMnews մեդիա-պլատֆորմը: