Չորեքշաբթի, 26 Օգոստոսի 2015 06:35

«Օրգանական  գյուղատնտեսական արտադրանքի հավաստագրման» ծրագրով հետաքրքրված անձինք արդեն կարող են՝ ծրագրի մրցույթային փուլին մասնակցելու համար ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿԻ պաշտոնական կայքէջից ներբեռնել դիմում հայտերը և  դրանք լրացնելով մասնակցել մրցույթին: Ինչպես օգոստոսի 25-ին ԱրմԻնֆո գործակալությանը տեղեկացվել է ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿԻ մամուլի ծառայությունից, դա վերաբերվում է գյուղատնտեսական օրգանական արտադրանք թողարկող տնտեսվարողներին և  մասնավոր ձեռնարկություններին:

 

Աղբյուրի համաձայն, հավաստագրման դիմած մասնակիցների սերտիֆիկացման համար ներկայացրած արտադրանքը մրցույթի շրջանակում կանցնի փորձագիտական գնահատում և արդյունքների ամփոփումից հետո մրցույթում հաղթող ճանաչված տնտեսվարողները ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿԻ և Գերմանիայի բնության պահպանության միության (NABU) ֆինանսական աջակցությամբ կանցնեն օրգանական սննդի սերտիֆիկացում:

 

Աղբյուրը նշում է, որ ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿԻ  և Գերմանիայի բնության պահպանության միության (NABU) միջև իրականացվող «Օրգանական  գյուղատնտեսական արտադրանքի հավաստագրման» ծրագրը մեկնարկել է դեռևս սույն թվականի մայիսի 22-ին: Ծրագիրն ուղղված է օրգանական արտադրանքի շուկայի ներկա իրավիճակի վերլուծությանը և բոլոր այն կազմակերպությունների և այն անհատների համար է, ովքեր հետաքրքրված են օրգանական հավաստագրում ստանալու մեջ:

Ծրագրի մեկնարկն ազդարարվեց կայացած համաժողովի ընթացքում, որին մասնակցում էին օրգանական գյուղատնտեսական արտադրանք թողարկող տնտեսվարողներ, ինչպես նաև ոլորտով հետաքրքրված այլ անձինք:

 

Նշենք, որ «ԱԿԲԱ ԿՐԵԴԻՏ ԱԳՐԻԿՈԼ ԲԱՆԿԸ» Հայաստանում գործում է 1995 թվականից, սկզբում որպես Գյուղացիական փոխօգնության կոոպերատիվ բանկ: 2006 թվականից բանկի մեծամասանական բաժնետերը դարձավ  եվրոպական խոշորագույն բանկային` Credit Agricole S.A. խումբը, 15.56% բաժնեմասով, որին հաջորդում է «Sacam International» բաժնետիրական ընկերությունը (Credit Agricole S.A. խմբի անդամ) - 12,44%: Բացի այդ, բանկի կապիտալին մասնակցում են նաև Գյուղացիական փոխօգնության 10 մարզային միություններ: Մասնաճյուղերի, ինչպես նաև մարզային մասնաճյուղերի, ցանցով բանկը երկրորդն է հանրապետությունում – 56 մասնաճյուղ, որոնց մեծ մասը գտնվում է մարզերում (41 մասնաճյուղ), իր ներկայությունն ապահովելով Հայաստանի բոլոր մարզերում: ԱԿԲԱ-Կրեդիտ Ագրիկոլ Բանկը հիմնական հաշվեկշռային ցուցանիշներով 2014 թ-ին իր դիրքերն ամրապնդել է լավագույնների հնգյակում: 

 

Ըստ ԱրմԻնֆո գործակալության` Հայաստանի բանկերի ֆինանսական վարկանիշների, գյուղատնտեսության վարկավորման հատվածում ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿԸ հանդիսանում է Հայաստանի բանկային շուկայի անփոխարինելի առաջատարը: Ներկայումս Հայաստանի բանկերի կողմից գյուղատնտեսության վարկավորմանն ուղղված ներդրումների ընդհանուր ծավալում ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿԻ մասնաբաժինը կազմում է ավելի քան 54%-ը, իսկ Բանկի վարկային պորտֆելում գյուղատնտեսական վարկերի տեսակարար կշիռը գերազանցում 39%-ը:

 

Հիշեցնենք, որ Գերմանիայի բնության պահպանության միությունը (NABU) ոչ պետական կառույց է, որն զբաղվում է շրջական միջավայրի կարևորագույն հարցերով, ինչպես երկրում, այնպես էլ նրա սահմաներից դուրս: Կազմակերպությունը հիմնվել է 1899 թվականին և ունի ավելի քան 502000 մասնակից և հովանավոր: Միայն Գերմանիայում ընկերությունն ունի 2000 մասնակից խումբ: