Արմինֆո. «Արցախը տանք, հանգիստ ապրենք» կեղծ թեզը թակարդ է Հայաստանի անվտանգության, պետականության և ընդհանրապես հայկականության համար: Այդ մասին Facebook-ի իր էջում գրել է ԱՀ ԱԺ "Արդարություն" խմբակցության պատգամավոր Մետաքսե Հակոբյանը՝ անդրադառնալով ադրբեջանական կողմին ականապատ դաշտերի քարտեզների 8 տեղամատյաններ փոխանցելու մտադրության մասին ՀՀ ԱԱԾ-ի հայտարարությանն Ադրբեջանի ագրեսիվ և վերջնագրային արձագանքին:
«Հայաստանի իշխանական խմբի, ականապատ տարածքների տեղամատյանների փոխանցման վերաբերյալ հեզ հայտարարությանն ի պատասխան, որտեղ նաև հավատարմությունն է ընդգծվում կեղծ «խաղաղության օրակարգին», ադրբեջանը բարկանալով, Արցախն իրենց նվիրած ու պատրաստակամ շարունակական զիջումների «հայ» գործընկերների վրա, նոր հրահանգներ ու առաջադրանքներ իջեցրեց...Այս ամենը չի ավարտվելու. սա ապացույցն է, որ «Արցախը տանք, հանգիստ ապրենք» կեղծ թեզը թակարդ է Հայաստանի անվտանգության, պետականության և ընդհանրապես հայկականության համար: Այս ամենը չի ավարտվելու, քանի դեռ մեր ճակատագրի տերերը ՀԱՅին ատող իշխանություններն են... Հ.Գ. նկարը, Արցախի Հանրապետության նախկին պետնախարար Ռուբեն Վարդանյանի կազմակերպած միջոցառումից է, երբ ադրբեջանցիները մեզ շրջափակել էին: Մեր տներում մնացած սննդից ամենալավ պատառիկներն էինք տարել: Հ.Հ.Գ. Արցախի Հանրապետությունը շրջափակված է հանցավոր համաձայնությունների արդյունքում: Ծանր ժամանակներ են առջևում, բայց պիտի դուրս գանք պատվով, որ Հայրենիք ունենալու իրավունք ու հնարավորություն ունենանք...», - գրել է Հակոբյանը:
Նշենք, որ Ադրբեջանի ԱԳՆ-ն այսօր Հայաստանի հասցեին սպառնալիքների հերթական խմբաքանակն է տարածել: Առիթը եղել է առանց նախապայմանների ադրբեջանական կողմին ականապատ դաշտերի 8 նոր տեղամատյաններ փոխանցելու մտադրության մասին հաղորդագրությունը ՝ քաղաքացիական բնակչության շրջանում կորուստները նվազագույնի հասցնելու նպատակով: