Հինգշաբթի, 17 Փետրվարի 2022 13:27

Արմինֆո.Իրականում 2021 թվին Հայաստանը լքել է 4200, այլ ոչ թե 43874 կամ, նույնիսկ, 73000 մարդ։ ԱրմԻնֆո-ին այդպիսի կարծիք է հայտնել Միջազգային հարաբերությունների և անվտանգության հարցերի հայկական ինստիտուտի ասոցացված փորձագետ, ժողովրդագրագետ Արտակ Մարկոսյանը։

 

"Նախորդ տարվա արդյունքներով միգրացիոն բացասական սալդոն կազմել է հենց 4200։ Այն դեպքում, երբ տարբեր ԶԼՄ-ների կողմից պարբերաբար, ավելի լավ կիրառման արժանի համառությամբ, ներկայացվող 43874 թիվը ցույց է տալիս միայն Հայաստան ժամանած և այստեղից մեկնած ուղևորահոսքի տարբերությունը։ Հասկանալի է, որ այդ ցուցանիշը չի արտացոլում եւ չի կարող արտացոլել միգրացիոն մնացորդը", - ընդգծել է նա։

 

Մարկոսյանի գնահատմամբ՝ այդ միգրացիոն սալդոն Վիճակագրական կոմիտեի մեթոդաբանական հաշվարկների արդյունք է։ Եվ 4200 մարդ միգրացիոն բացասական սալդոն, նրա կարծիքով, արդեն բավականին լուրջ մտահոգություն է ներշնչում։ Հատկապես, Հայաստանի՝ բնակչության բնական մեծ աճ ունեցող տարածաշրջանում գտնվելու պայմաններում։ Այս լույսի ներքո՝ ժողովրդագրագետը նշել է, որ նման միգրացիոն ցուցանիշները բոլորովին անհանգստություն չէին ներշնչի, օրինակ, Արևելյան Եվրոպայի որևէ երկրում։

 

Մինչդեռ, Հայաստանում ծնելիության գործակիցը, փորձագետի խոսքով, այսօր կազմում է 1,7, այսինքն, չի ապահովում գոյություն ունեցող բնակչության վերարտադրությունը։ Ինչը, ի թիվս այլ հանգամանքների, առաջին հերթին պայմանավորված է նախորդ դարի 90-ական թվականներին ծնելիության կտրուկ անկմամբ։ Արդյունքում՝ 2020 թվականին Հայաստանի բնակչության բնական աճը, ըստ Մարկոսյանի, կազմել է 1917 մարդ։ Ինչը, նրա գնահատմամբ, ամենացածր ցուցանիշներից մեկն է, հաշվի առնելով, որ, օրինակ, 2002 թվականին բնակչության բնական աճը հասել էր 7900-ի։

 

Անդրադառնալով միգրացիոն սալդոյի ցուցանիշներին՝ փորձագետը նկատել է, որ վերջին տարիներին Հայաստանում միակ դրական միգրացիոն սալդոն՝ + 3400 մարդ, գրանցվել է 2020 թվականին։ Ինչը պայմանավորված էր համավարակի հետևանքով փակված ճանապարհներով, ինչի հետևանքով տասնյակ հազարավոր հայրենակիցներ, այսպես կոչված, երկարաժամկետ միգրանտներ ստիպված եղան ՌԴ - ից վերադառնալ հայրենիք։ Մարկոսյանը հիշեցրել է, որ կորոնավիրուսային համավարակի արդյունքում Ռուսաստանում մնալով գրեթե առանց ապրուստի միջոցների, 2020 թվի ապրիլ-մայիս ամիսներին բոլոր այդ մարդիկ վերադարձել են Հայաստան։

 

"Այստեղ է, ի դեպ, թաքնված նաև 2021 թվականին Հայաստանից մեկնող հայկական անձնագրերով ուղևորահոսքի կտրուկ աճի բացատրությունը։ Հիմնականում, երկրից դուրս են եկել այն մարդիկ, ովքեր հայրենիք էին վերադարձել 2020 թվին: Քանի որ այդ ժամանակ ՌԴ-ում բրանց համար կրկին հնարավորություն է ստեղծվել աշխատել և բիզնես վարել: Այս լույսի ներքո, որոշ ԶԼՄ-ների կողմից որպես միգրացիոն բացասական սալդոյի վկայություն հնչեցված մուտքի և ելքի թվերը ոչ մի ընդհանուր բան չունեն իրական պատկերի հետ", - ամփոփել է Մարկոսյանը։