Երկուշաբթի, 23 Մարտի 2020 10:32

Արմինֆո.Կորոնավիրուսի դեմ պայքարում Հայաստանի իշխանությունների գլխավոր խնդիրը ոչ միայն համաճարակի կանխումն է, այլեւ մահերի բացառումը կամ նվազագույնի հասցնելը։ Այդ մասին երեկ երեկոյան Facebook-ի ուղիղ եթերում հայտարարել է վարչապետ Նիկոլ Փաշինյանը։

 

Նրա խոսքով, մարտի 22-ի երեկոյան դրությամբ հանրապետությունում պաշտոնապես հաստատվել է հիվանդացության 194 դեպք, որոնց 70%-ը կապված է Էջմիածնի իրադարձությունների եւ Երեւանի արտադրական օբյեկտի հետ: Այսօր, ինչպես նշել է կառավարության ղեկավարը, Էջմիածնում համաճարակի տարածման հետ կապված իրավիճակը հաջողվել է կանգնեցնել, քայլեր են ձեռնարկվում արտադրության դեպքերի հետ կապված վիրուսի տարածումը կանխելու ուղղությամբ:

 

Վարչապետը նշել է, որ վարակվածների 78%-ն, ընդհանրապես, ջերմություն չունի։ Հիվանդների 18%-ի մոտ ջերմաստիճանը պահպանվում է 37-38 աստիճանի սահմաններում, 3% - ի մոտ' 38-39 աստիճանի, 1% - ի մոտ' 39 աստիճանի եւ բարձր: Ընդ որում, երկրի 60 տարեկանից բարձր քաղաքացիների շրջանում արձանագրվել է կորոնավիրուսի 9 դեպք, 75 տարեկանից բարձր՝ 3 դեպք, 80-ից բարձր՝ կորոնավիրուսով հիվանդացության դեպք չի արձանագրվել: Թոքաբորբ ունեցող 14 հոգուց 6-ը ինտենսիվ թերապիայի կարիք ունեն, սակայն նրանց առողջական վիճակը, Նիկոլ Փաշինյանի հավաստմամբ, նույնպես կառավարելի է։

 

"Մենք պետք է անենք առավելագույնը, որպեսզի մեր ծնողները, տատիկներն ու պապիկները հնարավորինս պաշտպանված լինեն կորոնավիրուսից", - ասել է Փաշինյանը:

 

Նա նաև հաղորդել է, որ Վերին Լարսի անցակետը բաց է, ինչը հնարավորություն է տվել 140 ՀՀ քաղաքացու վերադառնալ հայրենիք: Վարչապետը երախտագիտություն է հայտնել Ռուսաստանի և Վրաստանի գործընկերներին այդ քայլի համար, քանի որ Վրաստանի տարածք օտարերկրյա պետությունների քաղաքացիների մուտքն արգելված է: Կառավարության ղեկավարը նաև ընդգծել է, որ Վերին Լարսի անցակետի գործարկմամբ վերսկսվել է նաև բեռնաշրջանառությունը։

 

Նշենք, որ վարակվածների թվում են Իրանից եւ Իտալիայից ժամանած Հայաստանի քաղաքացիներ (Երեւանի, Էջմիածնի, Մեղրիի եւ Չարենցավանի բնակիչներ), նրանց հետ շփված մարդիկ, ինչպես նաեւ Իտալիայի մեկ քաղաքացի եւ Ֆրանսիայից ժամանած մարդիկ: Ապաքինվել և հիվանդանոցից դուրս են գրվել կորոնավիրուսով հիվանդ երկու հիվանդ։