Երկուշաբթի, 2 Մարտի 2020 18:32

Արմինֆո. Խուճապի առիթ չկա։ Այդ մասին մարտի 2-ին մամուլի ասուլիսի ժամանակ հայտարարել է Տնտեսական մրցակցության պաշտպանության պետական հանձնաժողովի (ՏՄՊՊՀ) նախագահ Գեղամ Գեւորգյանը ՝ մեկնաբանելով Հայաստանում կորոնավիրուսով վարակման առաջին դեպքը հայտնաբերելու պատճառով պարենի, ախտահանիչների եւ դիմակների շուկայում իրարանցման հետ կապված իրավիճակը։

 

Գեւորգյանը, մասնավորապես, պատմել է, որ պետական հանձնաժողովը մոնիտորինգ է անցկացրել 90 դեղատներում, ինչի արդյունքում գների բարձրացման դեպքեր չեն հայտնաբերվել, որոնց մասին այսօր շատ է խոսվում: Նա ուշադրություն է հրավիրել այն հանգամանքին, որ որոշ դեղատներում այս պահին դիմակներ չկան, քանի որ որոշ ժամանակ առաջ Հայաստանը, որպես մարդասիրական օգնություն, դիմակներ էր արտահանում Չինաստան, սակայն խոշոր ներկրողների կողմից  գների բարձրացման մասին խոսելու հարկ  չկա։  "Այսինքն, արհեստական դեֆիցիտի մասին տեղեկատվությունը և դիմակների արժեքի բարձրացումը չեն համապատասխանում իրականությանը", - ասել է նա:

 

Այդ կապակցությամբ Գեւորգյանը նշել է, որ որոշ թանկացումներ նկատվում են փոքր դեղատներում, բացի այդ, դիմակների վաճառքի մասին հայտարարություններ կան սոցիալական ցանցերում եւ հայտարարությունների կայքերում, սակայն այդ անձինք խոշոր տնտեսվարող սուբյեկտներ չեն, եւ, հետեւաբար, նրանց գործունեությունը ՏՄՊՊՀ-ի տեսադաշտում չէ: Այս առնչությամբ ՏՄՊՊՀ ղեկավարը փոքր դեղատների տերերին կոչ է արել զերծ մնալ չարաշահումներից և գործել սոցիալական պատասխանատվության շրջանակներում:

 

Այս փուլում, նրա խոսքով, պետական հանձնաժողովն անընդհատ ռեժիմով աշխատում է օտարերկրյա գործընկերների հետ, որոնք զբաղվում են դիմակների արտադրությամբ՝ վերջիններիս Հայաստանի ներկրողների հետ կապելու նպատակով: "Մեր գործընկերները հայտարարում են, որ ողջ աշխարհում դիմակների դեֆիցիտ կա, և այդ կապակցությամբ որոշ երկրներում դիմակների գները մի փոքր բարձրացել են", - ասել է Գևորգյանը: Ընդ որում, նա նշել է, որ պետական սեկտորը, մասնավորապես, ՀՀ առողջապահության նախարարությունն ունի դիմակների իր ռեզերվը։  Բացի այդ, խոշոր ներկրողները նույնպես դիմակներ ունեն իրենց պահեստներում՝ հիվանդանոցների եւ անձնական կարիքների համար:

 

Ախտահանող միջոցների դեֆիցիտի վերաբերյալ Գեղամ Գևորգյանը նշել է, որ խնդիրը ծագել է կորոնավիրուսով վարակման առաջին դեպքի մասին լուրից անմիջապես հետո:  Քաղաքացիները մեծ թվով ախտահանիչ միջոցներ են գնել անցյած հանգստյան օրերին, երբ մատակարարում չի իրականացվում, այդ պատճառով շուկայում դեֆիցիտ է եղել: Բայց, հավատացնում եմ ձեզ, անհանգստանալու առիթ չկա, որովհետև միայն Հայաստանում  ալկոգել և այլ միջոցներ արտադրող երեք ընկերություն, որոնք երկու օրվա ընթացքում մեծ խմբաքանակ են հանելու շուկա", - ասել է նա, նշելով, որ այդ տեսակի ապրանքների գների բարձրացում ևս չի սպասվում։

 

ՏՄՊՊՀ-ի ղեկավարի վրդովմունքն է հարուցել պարենային շուկայում առաջացած իրարանցումը։   Գեղամ Գևորգյանը նման պահվածքն անհիմն է համարեց, հավաստիացնելով, որ խուճապի առիթ չկա և չի կարող լինել։

 

Հիշեցնենք, որ ավելի վաղ հայտնի էր դարձել, որ Հայաստանում հայտնաբերվել է նոր տիպի կորոնավիրուսի առաջին դեպքը։ Հիվանդը Թեհրանից Երեւան է ժամանել փետրվարի 28-ին։ Հիվանդն իրեն լավ է զգում։

 

Հավլենք, որ Առողջապահության նախարարությունում շուրջօրյա հասանելի է "թեժ գիծ" - 8003 ծառայությունը: Համաճարակաբանական իրավիճակի հարցերով կարելի է դիմել նաեւ Հիվանդությունների վերահսկման եւ կանխարգելման ազգային կենտրոն՝ 010 55 06 01, 010 55 03 06, 010 55 03 07 հեռախոսներով: