Արմինֆո. Եղվարդում (Կոտայքի մարզ) և Մարալիկում (Շիրակի մարզ) ծննդօգնության ծառայությունների փակման հարցը կարող է վերանայվել: Այս մասին հունվարի 14-ին կայացած մամուլի ասուլիսի ժամանակ հայտարարել է ՀՀ առողջապահության նախարար Արսեն Թորոսյանը ։ Հիշեցնենք, որ դրանց փակման հեռանկարը ավելի վաղ բողոքի ակցիաներ էր հրահրել՝ տեղի բնակչության մասնակցությամբ:
Նախարարը նշել է, որ 2018 թվականի կեսերից իր կարգադրությամբ նախաձեռնվել է ծննդօգնության ծառայություններ մատուցող բուժհաստատությունների վիճակի ուսումնասիրման գործընթաց: Ուշադրության կենտրոնում եղել են այնպիսի ասպեկտներ, ինչպիսիք են՝ համապատասխան պրոֆիլի մասնագետների առկայությունը, տեխնիկական հագեցվածությունը, տարեկան կտրվածքով ընդունված ծննդաբերության քանակը եւ այլն: Նրա խոսքով, այդ քայլը կատարվել է՝ ելնելով երկրում մանկական եւ մայրական մահացության կրճատման քաղաքականությունից, քանի որ տրամադրվող բուժծառայությունների որակն ուղղակիորեն կապված է այդ հարցի հետ:
Թորոսյանը տեղեկացրել է, որ ավելի վաղ ծննդատներին կարգերի տրամադրման գործընթացը թափանցիկ չէր, եւ հաճախ որոշում էր վերադաս անձանց զանգով: Հաշվի առնելով դա՝ 2018 թ. կեսին որոշում էր կայացվել ուսումնասիրել ծննդօգնության ծառայություններ մատուցող հաստատությունների վիճակը ՝ ելնելով օբյեկտիվ ցուցանիշներից: Բացի այդ, սահմանվել է բուժհաստատությունում ընդունված ծննդաբերության նվազագույն նշաձողը տարեկան կտրվածքով (150), եւ հաշվարկվել է հեռավորությունը մինչեւ մոտակա բժշկական կենտրոններ, որոնք բուժծառայություններ են մատուցում ավելի ընդլայնված ծավալով: Բացառություն է արվել այն բուժհաստատությունների համար, որոնք գտնվում են հեռավոր համայնքներում ՝ Բերդում, Ճամբարակում և Մեղրիում, և, հետևաբար, դրանց փակումը կարող է բացասաբար անդրադառնալ բուժսպասարկման մատչելիության ապահովման վրա ։
Արդյունքում սահմանված չափանիշներին չեն համապատասխանում Մարալիկ, Աչաջուր, Արտենի, Արծվաբերդ, Ծաղկահովիտ, Քաջարան և Եղվարդ համայնքների բուժհաստատություններում գործող ծննդօգնության ծառայությունները:
Ըստ Թորոսյանի ՝ Առողջապահության նախարարության չափանիշներին առավել մոտ են Եղվարդում <Նաիրի> ԲԿ-ի ցուցանիշները, որտեղ անցած տարվա ընթացքում ընդունվել է 136 ծննդաբերություն ՝ սահմանված 150 մինիմումի դեպքում: Բացի այդ, դժգոհություններ չեն առաջացել՝ տեխնիկական հագեցվածության և կադրերով համալրման տեսակետից: Հաշվի առնելով դա ՝ նախարարը տեղեկացրել է, որ բժշկական կենտրոնի ծննդօգնության ծառայության փակման հարցը կարող է վերանայվել ։ Ինչ վերաբերում է Մարալիկին, ապա այստեղ ավելի լուրջ անհամապատասխանություններ են հայտնաբերվել։ Բացի ընդունված ծննդաբերությունների ցածր ցուցանիշից (102-ը 2018-ի համար), չկան այնպիսի նեղ պրոֆիլային մասնագետներ, ինչպիսիք են՝ նեոնատոլոգը եւ անեսթեզիոլոգը, ինչպես նաեւ բացակայում է նորածինների ինտենսիվ թերապիայի ծառայությունը: Թորոսյանը նշել է, որ եթե այդ բացթողումներն ամբողջությամբ լուծվեն, ապա ծննդօգնության տվյալ ծառայության ապագան կքննարկվի մասնագետների մասնակցությամբ:
Հաշվի առնելով, որ Առողջապահության նախարարության պահանջներին չհամապատասխանող ծննդօգնության ծառայությունները գործում են բուժհաստատություններում, ապա նրանց աշխատակիցների աշխատանքի տեղավորման հարցը,ինչպես հայտարարել է Թորոսյանը, կլուծվի:
Նախարարը տեղեկացրել է, որ բուժհաստատությունների տեխնիկական հագեցվածության և կադրային համալրման ուսումնասիրության գործընթացը շարունակական է լինելու, և արդեն անդրադարձել է մանկաբուժության ծառայությանը ։ Այս գործընթացը ուղղակիորեն կապված է մանկական եւ մայրական մահացության նվազեցման քաղաքականության հետ, որն արդեն տալիս է իր արդյունքները: Այսպես՝ նախնական տվյալներով, մայրական մահացության նվազումը Հայաստանում կանխատեսվում է մեկ պրոմիլի մակարդակում ։ Ինչ վերաբերում է ծնելիության ցուցանիշներին, ապա, չնայած 2018-ի համեմատ 2019-ի որոշակի անկմանը, նախորդ տարիների համեմատ արձանագրվել է նվազման տեմպերի դանդաղում, ինչը ապագայում ժողովրդագրական իրավիճակի բարելավման հնարավորություն է տալիս ։
Թորոսյանը հիշեցրել է, որ ծննդօգնության ծառայություններին այս տարի հատկացվել է լրացուցիչ 700 մլն դրամ: Բացի այդ, մշակվել են Չարենցավանում, Տաշիրում, Աշտարակում, Ծաղկահովիտում, Թալինում, Արթիկում, Սիսիանում, Վաղարշապատում, Մասիսում և Եղվարդում բժշկական կենտրոնների հիմնանորոգման կամ կառուցման նախագծեր: