Արմինֆո. Վաշինգտոնում դրական են ընդունել Հայաստանի վարչապետի պաշտոնում Փաշինյանի խաղաղ, սահմանադրական, քաղաքական ընտրությունը: Այդ մասին ասվում է Ամերիկայի հայ ազգային կոմիտեի (ANCA) գործադիր տնօրեն Արամ Համփարյանի հայտարարությունում, որի տեքստը տրամադրվել է ԱրմԻնֆո-ին:
Համփարյանը համոզմունք է հայտնել, որ այդ քայլը բարձրացնում է Հայաստանի հեղինակությունն ԱՄՆ քաղաքական գործիչների շրջանակում` որպես անկախ, հուսալի և ժողովրդավարական գործընկեր ընդհանուր տարածաշրջանային և միջազգային գերակայությունների առաջ մղման գործում:
Ավելին, կազմակերպության գործադիր տնօրենը համոզված է, որ դա թույլ կտա ավելի համոզվել Հայաստանում առկա առաջընթացի (չնայած Բաքվի և Անկարայի կողմից շրջափակմանը) և հարևան Ադրբեջանում ու Թուրքիայում ժողովրդավարության ճգնաժամի հարցում: «Թույլ կտա ստեղծել ավելի բարենպաստ պայմաններ այնպիսի համաձայնագրերի իրագործման համար, ինչպես` կրկնակի հարկումը բացառելու շուրջ պայմանագիրը, «Հազարամյակի մարտահրավերներ՚ ծրագիրը, Լոս Անջելես-Երևան ուղիղ չվերթի գործարկումն ու այլ ծրագրեր, որոնք առնչվում են երկկողմ առևտրին և ներդրումներին: Կբարձրացնի Հայաստանի նկատմամբ միջազգային ներդրողների վստահությունը` որպես կայուն, հուսալի, անվտանգ, օրինավոր և շահութաբեր վայր բիզնես վարելու համար, ինչպես նաև` որպես կամուրջ Եվրասիայի և Մեծ մերձավոր արևելքի միջև: Դուռ կբացի հայ-ադրբեջանական հակամարտության կարգավորման շուրջ ԵԱՀԿ Մինսկի խմբի շրջանակում ընթացող բանակցություններին Արցախի կառուցողական մասնակցության վերականգնման համար: Նոր հնարավորություններ կստեղծի ԱՄՆ և Հայաստանի միջև ռազմական երկխոսության և համագործակցության ընդլայնման համար՚, - ասվում է Համփարյանի հայտարարությունում: