Երեթշաբթի, 20 Փետրվարի 2018 16:02

Արմինֆո.Հայաստանի քաղաքացիների զգալի մասը հայ-ռուսական բարձր մակարդակի վրա գտնվող հարաբերությունները կապում են երկու երկրների ղեկավարներ Սերժ Սարգսյանի և Վլադիմիր Պուտինի հետ: Այսպիսին են «Ժողովրդի ձայնը» հասարակական ակումբի կողմից անցկացված սոցհարցման արդյունքները:

 

Ինչպես փետրվարի 20-ին հարցման արդյունքների ներկայացման ժամանակ հայտնել է ակումբի փորձագետ Արման Ղուկասյանը, հարցումն անցկացվել է Հայաստանի բոլոր մարզերում և Երևանում տարբեր տարիքային խմբերին պատկանող 1000 քաղաքացիների շրջանում:

 

Սոցհարցման մասնակիցներից 28%-ը ներկայիս հայ-ռուսական հարաբերությունների բարձր մակարդակի վրա գտնվելու փաստը կապում են աշխարհաքաղաքական շահերի հետ, 37%-ի կարծիքով դա երկու երկրների ներկայիս նախագահների աշխատանքի արդյունքն է, 12%-ը համարում է, որ դրա պատճառը այս երկրների պատմական մտերմությունն է, իսկ 23%-ը այս փաստը կապում է Ռուսաստանում առկա հայկական մեծ համայնքի հետ:

 

Այն, թե ինչպես է Վլադիմիր Պուտինի` ՌԴ նախագահ ընտրվելու փաստն ազդում Հայաստանի վրա, հարցվողների 39%-ը նշել է կայունության ապահովում տարածաշրջանում, 28%-ի կարծիքով այն ազդում է Հայաստանում որոշակի տնտեսական բարեկեցության ապահովման վրա, 32%-ը համարում է, որ Վ. Պուտինի նախագահ լինելու փաստն ապահովում է Ռուսաստանում հայ համայնքի բարեկեցիկ կյանքը, իսկ 1%-ը գտնում է, որ ոչ մի ազդեցություն չունի նրա նախագահ լինելու հանգամանքը:

 

Իսկ թե ինչ ազդեցություն ունի Սերժ Սարգսյանի երկրի ղեկավար լինելու փաստը հայ-ռուսական հարաբերությունների վրա, հարցման արդյունքները ցույց են տվել, որ 44%-ի կարծիքով այն ապահովում է Հայաստանի ռուսամետ արտաքին վեկտորը, 52%-ը համարում է, որ այդ փաստն ազդում է Հայաստանի` ԵԱՏՄ-ի և ՀԱՊԿ-ի ակտիվ մասնակցության վրա, իսկ ընդամենը 4%-ը գտնում է, որ ոչ մի ազդեցություն չունի:

 

«Հայաստանի քաղաքացիների զգալի մասը հայ-ռուսական բարձր մակարդակի վրա գտնվող հարաբերությունները կապում են երկու երկրների ղեկավարների հետ: Հայ հասարակությունը Հայաստանում տնտեսական որոշակի բարեկեցությունը և կայունությունը տարածաշրջանում կապում է Ռուսաստանում Վ. Պուտինի ղեկավարման հետ: Հայաստանի ռուսամետ ուղղությունը և ԵԱՏՄ-ում և ՀԱՊԿ-ում անդամակցությունը հարցման մասնակիցները կապում են Ս. Սարգսյանի հետ: Ս. Սարգսյանը և Վ. Պուտինը համարվում են հայ-ռուսական դաշնակցական հարաբերությունների երաշխիք»,- եզրափակել է Ղուկասյանը: