Երկուշաբթի, 5 Հունիսի 2017 18:33

Արմինֆո. Թուրքիայում տեղակայված «Ինջիրլիք» ռազմակայանից գերմանացի զինծառայողների դուրսբերումը եվրոպական երկրների, Միացյալ Նահանգների և ԵՄ առանձին երկրներների հետ Անկարայի հարաբերություններում համալիր փոփոխությունների հետևանք է: ԱրմԻնֆո-ի թղթակցի հետ զրույցում այդպիսի կարծիք է հայտնել Կովկասի ինստիտուտի փոխտնօրեն Սերգեյ Մինասյանը:

 

Նրա խոսքով, Թուրքիան կձգտի փոխել գործընկերների հետ փոխհարաբերությունների աստիճանը, բայց միաժամանակ մի շարք հարցերի շուրջ, ինչպես՝ փախստականների խնդիրները, կշարունակի փոխգործակցությունը: Փորձագետը գտնում է նաև, որ Անկարայի և Բեռլինի հարաբերությունների վրա ազդել է նաև Թուրքիայի ներքաղաքական իրավիճակը, այդ թվում՝ Սահմանադրական հանրաքվեի շուրջ գործընթացները, ինչը դուր չի գալիս եվրոպական ժողովրդավարական պետություններին: «Կարծում եմ, որ «Ինջիրլիք» ռազմակայանի շուրջ բանակցությունները բարդ և բազմավեկտոր կլինեն»,- ասել է քաղաքագետը:

 

Միաժամանակ նա դժվարացել է ասել, թե արդյոք կողմերին կհաջողվի հաղթահարել գոյություն ունեցող տարաձայնությունները և վերադառնալ փոխգործակցության նախկին մակարդակին, թե գերմանական զորքերը, այնուամենայնիվ, դուրս կբերվեն:

 

Նշենք, որ Գերմանիայի ԱԳՆ ղեկավար Զիգմար Գաբրիելն այսօր ժամանել է Անկարա՝ «Ինջիրլիք» ռազմակայանում Գերմանիայի ռազմաօդային ուժերի առկայության հարցը քննարկելու համար: ԳԴՀ ԱԳՆ ղեկավարը թուրք գործընկերոջ հետ բանակցություններից հետո ԶԼՄ-ներին հայտնել է, որ Գերմանիան և Թուրքիան չեն կարողացել հաղթահարել գերմանացի խորհրդարանականների կողմից «Ինջիրլիք» ռազմակայան այցելության առնչությամբ տարաձայնությունները. դա նշանակում է, որ Բեռլինը պետք է այնտեղից դուր բերի իր զինվորներին: «Ցավում եմ, բայց ներքաղաքական պատճառներով մենք պետք է վերաբաշխենք մեր զինծառայողներին: Մոտ ժամանակներս խորհրդարանն ավիաբազայի նոր վայրի որոնման մանդատ կտրամադրի կառավարությանը»,- ասել է Զիգմար Գաբրիելը:

 

«Ինջիրլիք» ռազմակայանի շուրջ կոնֆլիկտի երկրորդ փուլը Թուրքիայի և Գերմանիայի միջև սկսվեց մայիսի կեսին, երբ Անկարան մուտքի թույլտվություն չտվեց ԳԴՀ Բունդեսթագի պաշտպանության հարցերով հանձնաժողովի պատվիրակությանը, որը պետք է այցելեր «Ինջիրլիք»: Թուրքական իշխանություններն այդ քայլին գնացին այն բանից հետո, երբ Բեռլինն ապաստարան տվեց Թուրքիայից զինծառայողներին: ԳԴՀ կանցլեր Անգելա Մերկելն ասել է, որ եթե որոշումը չփոխվի, ստիպված կլինեն զինծառայողներին դուրս բերել և վերատեղաբաշխել այլ պետության ռազմակայանում: Մեկնաբանելով Մերկելի խոսքերը՝ Թուրքիայի նախագահ Ռեջեփ Թայիփ Էրդողանն ասել է, որ Թուրքիայի հարավում գտնվող «Ինջիրլիք» ռազմակայանից Գերմանիայի ռազմաօդային ուժերի հնարավոր դուրսբերումը խնդիր չի ներկայացնում Անկարայի համար:

 

Հիշեցնենք, որ Անկարայի և Բեռլինի միջև կոնֆլիկտի առաջին փուլն սկիզբ առավ անցած տարվա ամռանը, երբ ԳԴՀ Բունդեսթագը հունիսի 2-ին Օսմանյան կայսրությունում Հայոց ցեղասպանության ճանաչման և դատապարտման վերաբերյալ բանաձև ընդունեց: Միաժամանակ արգելվեց գերմանացի պատգամավորների այցը ռազմակայան, ինչպես նաև հետ կանչվեց Բեռլինում Թուրքիայի դեսպանը:

 

«Ինջիրլիք» ռազմակայանը տարածաշրջանում ԱՄՆ և ՆԱՏՕ-ի հիմնական բազաներից մեկն է: Այստեղ են տեղակայված ԱՄՆ գլխավորթւամբ միջազգային կոալիցիայի երկրների ինքնաթիռները, որոնք մասնակցում են «Իսլամական պետություն» ահաբեկչական կազմակերպության դեմ օդային գործողություններին: Գերմանացի ռազմական մասնագետները ներգրավված են ՆԱՏՕ-ի AWACS ռադիոլոկացիոն հետախուզության ինքնաթիռների համար անձնակազմերի ձևավորման գործում: Բեռլինը նաև աջակցում է կոալիցիայի գործողություններին՝ «Ինջիրլիքում» տեղակայված Tornado վեց հետախույզ ինքնաթիռների օգնությամբ: Tornado ինքնաթիռները գրեթե ամեն օր հետախուզական թռիչքներ են իրականացում Սիրիայի օդային տարածությունում: Սիրիական գործողությունում Բունդեսթագի մանդատը ցամաքային գործողություններին մասնակցություն չի ենթադրում: «Ինջիրլիք» ռազմակայանում ընդհանուր առմամբ տեղակայված է շուրջ 260 գերմանացի զինվորական: