Արմինֆո. Նախագահ Սերժ Սարգսյանը Արմավիրի մարզ աշխատանքային այցի շրջանակում Էջմիածին քաղաքում մասնակցել է Վաղարշապատի ֆուտբոլի ակադեմիայի հիմնարկեքի արարողությանը:
Ինչպես ԱրմԻնֆո-ին հաղորդեցին ՀՀ նախագահի մամլո գրասենյկից, արարողությանը ամսնակցել են նաև Եվրոպական ֆուտբոլային ասոցիացիաների միության (ՈՒԵՖԱ) նախագահ Ալեքսանդր Չեֆերինը, Հայաստանի ֆուտբոլի ֆեդերացիայի (ՀՖՖ) գործկոմի անդամ, Երևանի քաղաքապետ Տարոն Մարգարյանը, ՀՖՖ նախագահ Ռուբեն Հայրապետյանը, մարզային և քաղաքային իշխանությունները, տեղի պատգամավորները, սպորտի ոլորտի պատասխանատուներ, Էջմիածնի թիվ 1 մարզադպրոցի սաներ և քաղաքի բնակիչները: Վաղարշապատի ֆուտբոլի ակադեմիայի կառուցման ծրագիրը ՀՖՖ-ի, ՈւԵՖԱ-ի և Ֆուտբոլի համաշխարհային միության (ՖԻՖԱ) կողմից իրականացվող համատեղ ներդրումային ծրագիր է: Շուրջ 900 մլն դրամ արժողությամբ հիշյալ ծրագրի իրականացումն սկսվել է 2016թ. հոկտեմբերին, նախատեսվում է ավարտել 2017թ. հոկտեմբերին:
Հանրապետության նախագահն ակադեմիայի կառուցման շինհրապարակում ծանոթացել է ինչպես Վաղարշապատի, այնպես էլ մարզի մեկ այլ՝ Արմավիր քաղաքում կառուցվող ֆուտբոլի ակադեմիայի շինարարական նախագծերին, զրուցել ծրագրի պատասխանատուների և շինարարների հետ: Նրանց հավաստմամբ, Վաղարշապատի ֆուտբոլի ակադեմիայի 1100 քմ ընդհանուր մակերեսով երկհարկանի մասնաշենքում կլինեն ժամանակակից ֆուտբոլը սպասարկող ենթակառուցվածքներ: Բացօթյա լողավազանը, արհեստական 1 և բնական խոտածածկով 3 խաղադաշտերը կառուցվելու են ժամանակակից տեխնոլոգիաներով՝ ՖԻՖԱ-ի և ՈՒԵՖԱ-ի կողմից պրոֆեսիոնալ ֆուտբոլի համար սահմանված չափանիշներին համապատասխան: Կկառուցվի նաև մոտ 500 նստատեղով տրիբունա՝ ֆուտբոլի առաջնությունների պաշտոնական հանդիպումներ հյուրընկալելու նպատակով: Նորակառույց ակադեմիան աշխատանքով կապահովի 25-30 մարդու՝ 130-150 հազար դրամ միջին աշխատավարձով:
Նախագահ Սերժ Սարգսյանին ներկայացվել է նաև, որ ընթացիկ տարվա փետրվարին մեկնարկած շուրջ 1.4 մլրդ դրամ արժողությամբ Արմավիրի ֆուտբոլի ակադեմիայի կառուցման ծրագիրը կավարտվի 2019թ. հոկտեմբերին: Այն ևս ՀՖՖ-ի, ՈւԵՖԱ-ի և ՖԻՖԱ-ի կողմից իրականացվող համատեղ ներդրումային ծրագիր է:
Պատասխանատուների հավաստմամբ, ինչպես Վաղարշապատի, այնպես էլ Արմավիրի ֆուտբոլի ակադեմիաներում կարող են մարզվել մինչև 600 պատանիներ և աղջիկներ: Վերոնշյալ երկու ակադեմիաները կառուցվում են ի լրումն 2010-2014 թվականներին Հայկական ֆուտբոլի ռազմավարական զարգացման ծրագրի շրջանակներում շահագործման հանձնված ՀՖՖ տեխնիկական կենտրոն ակադեմիայի, Գյումրու ֆուտբոլի ակադեմիայի և Վանաձորի ֆուտբոլի ակադեմիայի:
Վաղարշապատի ֆուտբոլի ակադեմիայի հիմնարկեքի արարողությունից հետո ՀՀ նախագահը հանդիպում է ունեցել ՈՒԵՖԱ-ի նախագահ Ալեքսանդր Չեֆերինի հետ: