Երեթշաբթի, 24 Հունվարի 2017 12:01

Արմինֆո. ԵԽԽՎ-ում Հայաստանի պատվիրակության անդամ Նաիրա Զոհրաբյանը ԵԽ մարդու իրավունքների հանձնակատար Նիլս Մույժնիեքսին կոչ է արել արձագանքել ռուս-իսրայելական բլոգեր Ալեքսանդր Լապշինի գործին և թույլ չտալ Բելառուսից նրա արտահանձնումն Ադրբեջանին:

 

Հայ պատգամավորը հիշեցրել է, որ Բաքվի «սեւ ցուցակում» ներառված է 600-ից ավելի «persona non grata», որոնցից 180-ը լրագրողներ են, որոնք այցելել են Լեռնային Ղարաբաղ՝ իրենց լրագրողական պարտականությունը կատարելու համար։ Նա Ադրբեջանի նման վարքագիծը որակել է ոտնձգություն խոսքի ազատության նկատմամբ, ինչը պետք է քննարկումների առիթ դառնա ինչպես ԵԽԽՎ-ում, այնպես էլ մյուս կառույցներում: «Քանի՞ հազար մարդ պետք է ավելանա Ադրբեջանի «սեւ ցուցակում», որպեսզի մեր Վեհաժողովը վերջապես դրան անդրադառնա, քանի՞ լրագրող, զանգվածային լրատվության ներկայացուցիչ ԼՂՀ այցելելու համար Ադրբեջանի պահանջով պետք է հետախուզվի Ինտերպոլով, որպեսզի մենք հասկանանք, որ մեր լռությունն ուղղակի դատապարտելի է: Ժամանակն է, որ մեր կազմակերպությունը վերջապես զարթնի  իր Լեթարգիական քնից եւ արձագանքի Ադրբեջանի այս խայտառակ քաղաքականությանը՝ ուղղված խոսքի, խղճի, մամուլի ազատության դեմ», - ընդգծել է Նաիրա Զոհրաբյանը: Նա լրագրողների պաշտպանության պլատֆորմին կոչ է արել միջամտել այդ գործընթացին:

 

Հիշեցնենք, որ հունվարի 20-ին Բելառուսի գլխավոր դատախազի տեղակալ Ալեքսեյ Ստուկը, ուսումնասիրելով Ռուսաստանի և Իսրայելի քաղաքացի, հայտնի բլոգեր Ալեքսանդր Լապշինին քրեական պատասխանատվության ենթարկելու համար արտահանձնելու վերաբերյալ Ադրբեջանի գլխավոր դատախազության խնդրանքը, որոշել էր բավարարել այն: Ռուսաստանի ԱԳՆ-ում ԱրմԻնֆո-ի թղթակցին հաղորդել էին, որ Մինսկում ՌԴ դեսպանությունն օրենսդրությամբ նախատեսված բոլոր միջոցները ձեռնարկում է ռուս-իսրայելական բլոգեր Ալեքսանդր Լապշինի իրավունքներն ու շահերը պաշտպանելու համար:

 

Դեկտեմբերի կեսին Լապշինը հաղորդել էր, որ Մինսկում իրեն ձերբակալել են Ադրբեջանի հարցմամբ, որտեղ ինքը ներառված է «սև ցուցակում»` ԼՂՀ այցելելու համար, ուստի նրա մուտքն Ադրբեջան արգելված է: Այդուհանդերձ, 2015 թվականի հունիսին Լապշինին հաջողվել էր մուտք գործել Ադրբեջան Վրաստանով` ուկրաինական անձնագրով, որտեղ «Ալեքսանդր» անունը գրված էր «Օլեքսանդր»: Դրանից հետո Ադրբեջանը բլոգերի նկատմամբ միջազգային հետախուզում էր հայտարարել` «պետական սահմանի մասին» օրենքը և երկրի միգրացիոն օրենսգիրքը խախտելու համար:

 

Հունվարի 17-ին ՌԴ արտգործնախարար Սերգեյ Լավրովը, մեկնաբանելով  ԼՂՀ այցելելու համար Ադրբեջանի հարցմամբ Ալեքսանդր Լապշինի ձերբակալությունը, նշել էր, որ Ռուսաստանը դեմ է լրագրողների կամ, պարզապես, մասնավոր անձանց այս կամ տարածաշրջան այցելության քրեականցմանը:  Նրա հավաստմամբ, ռուսական կողմը նաև դեմ է, որպեսզի որևէ երկրում ձերբակալված ՌԴ քաղաքացիներին արտահանձնեն երրորդ երկրի: Նա նաև հաղորդել էր, որ Լապշինի հետ եղել է հյուպատոսական շփում, և, քանի որ նա նաև Իսրայելի քաղաքացի է, Իսրայելի դիվանագետները նույնպես նրա հետ շփումներ են պահպանում: «Ելնում ենք այն բանից, որ ձեռնակենք բոլոր միջոցները, որպեսզի իրավիճակը կարգավորենք ՌԴ քաղաքացու իրավունքների լիակատար հարգման պայմաններում, ով նաև Իսրայելի քաղաքացի է», - հայտարարել էր Լավրովը:

 

Մինչդեռ Ադրբեջանի արտգործնախարար Էլմար Մամեդյարովը հայտարարել է, որ բլոգեր Ալեքսանդր Լապշինի գործը դիտարկվում է բացառապես իրավաբանական հարթությունում: