Արմինֆո. Ազգային ժողովի պատգամավոր Նիկոլ Փաշինյանը շրջանառության մեջ է դրել «Բարձրաստիճան պաշտոնատար անձանց եւ նրանց հետ փոխկապակցված անձանց եկամուտների ձեւավորման աղբյուրները եւ գույքային վիճակն ուսումնասիրող ՀՀ Ազգային ժողովի ժամանակավոր հանձնաժողով ստեղծելու մասին» ԱԺ որոշման նախագիծը: Այդ մասին նա գրել է «Ֆեյսբուքի» իր էջում:
Փաստաթղթով նախատեսվում է, որ առաջին փուլով կուսումնասիրվի 2008 թվականի հունվարի 1-ից հետո պաշտոնավարած բարձրաստիճան անձանց եւ նրանց հետ փոխկապակցված անձանց եկամուտների եւ գույքի ծագման աղբյուրները եւ այդ մասին հանրությանը տեղեկանք կներկայացվի մինչեւ 2017թ. ապրիլի 2-ը: «Հայաստանից գողացվածը պետք է վերադարձվի», - գրել է Փաշինյանը: Նրա ասելով, այդ նախաձեռնությունը նպատակուղղված է երկրում հասարակական վստահության մակարդակի բարձրացմանը:
Հանձնաժողովի աշխատանքը պետք է լինի թափանցիկ` քաղաքացիական հասարակության ներյկայացուցիչների մասնակցությամբ: Որոշման նախագծում նշվում է, որ Հանձնաժողովում քննարկվող հարցերի վերաբերյալ համապատասխան պարզաբանումներ եւ տեղեկատվություն ստանալու նպատակով,բարձրաստիճան պաշտոնատար անձանցից պարզաբանումներ և տեղեկատվություն ստանալու գործընթացը կարող է տեսանկարահանվել: Հանձնաժողովն իր աշխատանքներում ներգրավում է համապատասխան մասնագետների և փորձագետների և բարձրաստիճան պաշտոնատար անձանց և բարձրաստիճան պաշտոնատար անձանց հետ փոխկապակցված անձանց եկամուտների ձևավորման աղբյուրների մասին իր գրավոր եզրակացությունը ներկայացնում է համապատասխան իրավասու մարմիններին: Որոշման նախագծի համաձայն, Հանձնաժողովը իր աշխատանքներն իրականացնում է երեք փուլով և ընտրանքային մեխանիզմով, ինչը ենթադրում է որոշակի ռիսկերի հաշվառմամբ կոնկրետ պաշտոնատար անձանց և նրանց հետ փոխկապակցված անձանց գույքի և եկամուտների և դրանց առաջացման աղբյուրների ուսումնասիրություն (ընտրանքային մեխանիզմը չի վերաբերում Հանրապետության նախագահներին և նրանց հետ փոխկապակցված անձանց, որոնց եկամուտները և դրանց առաջացման աղբյուրները ենթակա են անվերապահ ուսումնասիրության):
«1-ին փուլում սույն որոշման 3-րդ կետով նախատեսված ուսումնասիրությունները իրականացվում են 2008 թվականի հունվարի1-ից հետո և պաշտոնավարող եւ պաշտոնավարած բարձրաստիճան պաշտոնատար անձանց և նրանց հետ փոխկապակցված անձանց գույքի ու եկամուտների մասով։ 1-ին փուլը պետք է ավարտվի մինչև 2017 թվականի ապրիլի 2-ը։
- 2-րդ փուլում սույն որոշման 3-րդ կետով նախատեսված ուսումնասիրությունները իրականացվում են 1998 թվականի հունվարի 1-ից մինչև 2008 թվականի հունվարի 1-ը պաշտոնավարող բարձրաստիճան պաշտոնատար անձանց և նրանց հետ փոխկապակցված անձանց գույքի ու եկամուտների մասով։ 2-րդ փուլը պետք է ավարտվի մինչև 2017 թվականի հուլիսի 1-ը։
- 3-րդ փուլում սույն որոշման 3-րդ կետով նախատեսված ուսումնասիրությունները իրականացվում են 1991 թվականի հոկտեմբերի 1-ից և մինչև 1998 թվականի հունվարի 1-ը պաշտոնավարող բարձրաստիճան պաշտոնատար անձանց և նրանց հետ փոխկապակցված անձանց գույքի ու եկամուտների մասով։ 3-րդ փուլը պետք է ավարտվի մինչև 2017 թվականի նոյեմբերի 1-ը։
- Յուրաքանչյուր փուլի ավարտման օրը հրապարակվում է Հանձնաժողովի գրավոր եզրակացություն։
5. Հանձնաժողովը կազմված է յոթ անդամից: Ազգային ժողովի Հանրապետական խմբակցությունն ունի Հանձնաժողովի կազմում 2, իսկ մնացած խմբակցությունները՝ մեկական ներկայացուցիչ ներկայացնելու իրավունք: Հանձնաժողովն իր կազմից, ձայների պարզ մեծամասնությամբ, ընտրում է նախագահ:
6. Հանձնաժողովի փորձագետներին և մասնագետների կազմը պետք է բաղկացած լինի ոչ պակաս, քան յոթ և ոչ ավելի քան 13 անդամից։ Փորձագետներին և մասնագետներին նշանակում են Հանձնաժողովի ընդդիմադիր խմբակցությունները ներկայացնող անդամները։
7. Խմբակցությունները Հանձնաժողովի կազմում իրենց անդամներին ներկայացնում են սույն որոշումն ուժի մեջ մտնելու օրվանից հետո՝ երեք աշխատանքային օրվա ընթացքում Հանձնաժողովի առաջին նիստը գումարվում է այդ ժամկետը լրանալու օրվան հաջորդող առաջին երկուշաբթի օրը՝ ժամը 11:00-ին:
8. Ազգային ժողովի աշխատակազմը Ազգային ժողովի մշտական հանձնաժողովների համար սահմանված կարգով ապահովում է Հանձնաժողովի գործունեության համար անհրաժեշտ պայմաններ:
9. Հանձնաժողովը իր ամփոփիչ գրավոր եզրակացությունը Ազգային ժողովի նիստում ներկայացնում է մինչեւ 2017 թվականի դեկտեմբերի 5-ը: Եզրակացության վերաբերյալ դիտողություններ եւ առարկություններ ունեցող Հանձնաժողովի անդամները կարող են ներկայացնել հատուկ կարծիք, որը կցվում է Հանձնաժողովի եզրակացությանը:
10. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը», - ասվում է Նիկոլ Փաշինյանի ներկայացրած որոշման նախագծում: