Արմինֆո. Այն ամենն, ինչ Հայաստանը ցանկանում էր հասկացնել Ադրբեջանին զորահանդեսի ժամանակ, հասկակցրեց, այդ է վկայում Բաքվի արձագանքը: Այդ մասին հայտարարել է Հայաստանի պաշտպանության նախկին նախարար Վաղարշակ Հարությունյանը` սեպտեմբերի 23-ին կայացած մամուլի ասուլիսում:
«Սեպտեմբերի 21-ին Հանրապետության հրապարակում կայացած զորահանդեսն ամենաներկայացուցչականն էր Հայաստանի նորագույն պատմության ընթացքում` արդի սպառազնիության գերժամանակակից տարատեսակների առկայության տեսանկյունից: Դա քաղաքական ենթատեքստ ունեցող ռազմավարական քայլ է և Ադրբեջանին սանձելու նպատակ է հետապնդում: Այսօրվա դրությամբ Հայաստանի հակաօդային պաշտպանությունն ամենահզորն է տարածաշրջանում, և դրան նպաստում են Հայաստանի պաշտպանական գերատեսչության հաշվեկշռում գտնվող «Բուկ-Մ2» ԶՀՀ և ռադիոհետախուզության ու ռադիոէլեկտրոնային ճնշման «Ինֆաունա» համալիրը», - նշել է պաշտպանության նախկին նախարարը:
Նրա ասելով, այդ համալիրները նոր մակարդակի են բարձրացնում հնարավոր ռազմական գործողությունները, իսկ «Ինֆաունան» այն անօդաչու թռչող սարքերի դեմ պայքարի արդյունավետ միջտոց է, որոնք Ադրբեջանը լայնորեն կիրառեց ապրիլի մարտական գործողությունների ընթացքում:
Անդրադառնալով «Իսկանդեր» օպերատիվ-մարտվարական հրթիռային համալիրին, որոնք ցուցադրվեցին Երևանի զորահանդեսում, Հարությունյանը նշել է, որ ռուսական կողմից Հայաստանին դրանց մատակարարումը պաշտոնական Երևանի ճիշտ արտաքին քաղաքականության արդյունք է:
«Ռուսաստանի կողմից «Իսկանդեր» համալիրների մատակարարումը Հայաստանին հայ-ռուսական դաշնակցային հարաբերությունների վկայությունն է, քանի որ «Սկադ» հրթիռային համակարգերի և «Իսկանդեր» ՕՄՀՀ վրա կարող են օգտագործվել միջուկային մարտագլխիկներ, իսկ պաշտոնական Մոսկվան երբեք այդ մակարդակի ռազմավարական սպառազինություն չի տրամադրի, այսպես ասած, «ոչ բարեկամ» պետությանը», - ընդգծել է Հայաստանի պաշտպանության նախկին նախարարը:
Լրագրողների այն դիտողությանը, թե արդյոք կա երաշխիք, որ Հայայստանին վաճառելով «Իսկանդերներ», Ռուսաստանն Ադրբեջանին չի վաճառել սպառազինություն, որն ի զորու է հակադարձել այդ համալիրների գրոհները, Հարությունյանը նշել է, որ այդ համալիրների գրոհները փոքրիշատե կարող են կասեցնել ռուսական «Ս-400» կամ ամերիկյան «Փեթրիոթ» ԶՀՀ-ները, սակայն Բաքուն չունի դրանցից ոչ մեկը և հեռանկարում, հաստատ, չի ունենա: Փոխարենը` Հայաստանն այժմ կարող է խոցել հարևան Ադրբեջանի տարածքում գտնվող ցանկացած թիրախ:
«Ահա ձեր հարցի պատասխանը: Ավելին, Ռուսաստանը շահագրգռված չէ հակամարտության բռնկմամբ տարածաշրջանում, քանի որ անմիջապես կկորցնի իր դիրքերը: Երևանի զորահանդեսում ռուսական ժամանակակից համալիրների ցուցադրումը կնպաստի Լեռնային Ղարաբաղի հակամարտության կարգավորմանը և կկանխի լայնածավալ ռազմական գործողությունները տարածաշրջանում: Զորահանդեսում ցուցադրվել է մեր բանակի հաշվեկշռում գտնվող սպառազինության մի մասը միայն, և դա պայմանավորված է մի շարք գործոններով, այդ թվում` պետական և ռազմական գաղտնիկքով», - նշել է փորձագետը:
Անդրադառնալով այն դիտողությանը, թե ինչու Հայայստանը, ունենոլով հզոր ՀՕՊ, Կովկասի տարածաշրջանում հայ-ռուսական ՀՕՊ միավորված տարածաշրջանային համակարգ է ստեղծում, Հարությունյանը փաստել է, որ 1992 թվականից ի վեր Ռուսաստանը հայկական կողմին օգնել կառուցել ՀՕՊ համակարգ, և եթե չլիներ ռուսական կողմը, ապա Հայաստանի ՀՕՊ կլիներ Վրաստանի մակարդակի:
Ինչպես արդեն հաղորդվել է, Հայաստանի անկախության 25-ամյակին նվիրված զորահանդեսը և դրա ընթացքում նորագույն սպառազինության ցուցադրումը խուճապի է մատնել Ադրբեջանին: Ադրբեջանի նախագահ, ԶՈՒ գերագույն գլխավոր հրամանատար Իլհամ Ալիևը հանձնարարել է ծառայողական նիստ անցկացնել Պաշտպանության նախարարության ղեկավարության մասնակցությամբ, որի ընթացքում պաշտպանության նախարար Զակիր Գասանովը համապատասխան հանձնարարականներ է տվել` խստացնելու հսկողությունը հայկական կողմի ռազմական և ռազմավարական նշանակության օբյեկտների նկատմամբ և անհրաժեշտության դեպքում պատրաստ լինել անմիջապես ոչնչացնելու այդ օբյեկտները` ըստ դրանց կարևորության աստիճանի:
Նշենք, որ Երևանում կայացած զորահանդեսում ներկայացվել են հայրենական արտադրության «Կռունկ» անօդաչու թռչող սարքեր, որոնք իրենց մարտավարական տվյալներով չեն զիջում արտասահմանյան նմուշներին, ռադիոէլեկտրոնային պայքարի մարտական կայաններ, մոտոհրաձգային և զրահատանկային տեխնիկա, «Տ-72» տանկեր, զրահամեքենաներ, ինքնագնացներ, «Շտուրմ Ս» հակատանկային համալիրներ, հակատանկային ինքնագնաց կայանքներ, գնդացիրներ, «Գրադ», «Տայֆուն», «WM 80», «Սմերչ», «Կոնկուրս» համազարկային կրակի ռեակտիվ համակարգեր, «Տոչկա ՈՒ», «Սկադ» մարտավարական հրթիռային համալիրներ, «Իսկանդեր» օպերատիվ-մարտվարական հրթիռային համալիր, «Օսա-ԱԿ(Մ)» արդիականացված համալիրներ, «Ս 125», «Ստրելա 10», «Բուկ» արդիականացված զենիթահրթիռային համալիրներ, «Ս300» հրթիռային համալիրներ: