Այսօր Վրաստանում նախադրյալներ չկան նախկի նախագահ Միխայիլ Սահակաշվիլիի իշխանության վերադառնալու համար, քանի որ բնակչության մեծ մասը դա չի ցանկանում: Այդ մասին լրագրողների հետ հանդիպմանը հայտարարել է Վրաստանի խորհրդարանի նախկին խոսնակ, «Ժողովրդավարական շարժում-Միացյալ Վրաստան» կուսակցության առաջնորդ Նինո Բուրջանաձեն, պատասխանելով ԱրմԻնֆո-ի այն հարցին, թե արդյոք այսօր Վրաստանում կան նախադրյալներ Սահակաշվիլիի իշխանության վերադարձի համար:
«Սակայն, եկեք անկեղծ խոսենք: Արդի աշխարհում կան տեխնոլոգիաներ, որոնք միշտ չէ, որ արտացոլում են բնակչության մեծ մասի կամքը, խոսքը վերաբերում է մեդիայի, որոշակի ՈԿԿ-ների գործիքնրին և այն ուժին, որը կարող է կիրառվել նախընտրական քարոզարշավի ժամանակ: Կարծում եմ, որ Սահակաշվիլին ռևանշի հնարավորություն ունի` կառավարող «Վրացական երազանք» կուսակցության անողնաշար լինելու և անարդյունավետ գործունեության պատճառով: Այսինքն, այդպիսի հնարավորություն կա, այսպես կոչված` վրացական մայդանի միջոցով», - կարծում է ընդդիմադիր գործիչը: Բուրջանաձեն համոզված է, որ Վրաստանում օրինական ընտրությունների ճանապարհով իշխանության վերադառնալու Սահակաշվիլիի հնարավորությունը հավասար է զրոյի, չնայած այն հանգամանքին, որ «Վրացական երազանքը» լիովին իրեն վարկաբեկել է որպես քաղաքական ուժ: Նա կարծում է, որ «Միացյալ ազգային շարժում» կուսակցությունն առաջիկա աշնանը խորհրդարանական ընտրություններում հաղթելու հնարավարություն չունի: «Նրանք կարող են ապահովել ընտրողների 15%-ի աջակցությունը, և դա` առավելագույնը: Հասկանում եք` որն է անհեթեթությունը, չնայած այն հանգամանքին, որ ՄԱՇ արդեն 4 տարի ընդդիմություն է, նա կարողացել է պահել իր հզոր և հեղինակավոր հեռուստաալիքը, ունի վարչական ռեսուրս, վիթխարի ֆինանսական ռեսուրս, կա մոտիվացիա և Արևմուտքի միանաշանակ աջակցությունը, իսկ դա արդեն լուրջ է: Հասկանում եք, սա, գործնականում, եզակի դեպք է, «Վրացական երազանքը» որքան պետք է ձգտեր նման բան թույլ տալու համար», - տարակուսանք է հայտնել քաղաքական գործիչը: Նա, միևնույն ժամանակ, հույս է հայտնել, որ երկրի ժողովուրդը թույլ չի տա Սահակաշվիլիի վերադարձն իշխանության: Բուրջանաձեն ընդգծել է, որ իր գլխավորած կուսակցությունը հնարավորինը կանի դա թույլ չտալու համար: «Անշուշտ, «Վրացական երազանքը» վնասակար է, անողնաշար, սակայն` ոչ այնպես հանցավոր, ինչպես «Միացյալ ազգային շարժումը», - հայտարարել է ընդդիմադիր գործիչը:
Բուրջանաձեն նաև չի բացառել փոխգործակցությունը «Վրացական երազանքի» հետ` ցանկալի նպատակին հասնելու համար, սակայն հույս է հայտնել, որ դրա կարիքը, այնուամենայնիվ, չի լինի: Միևնույն ժամանակ, անդրադառնալով շրջանառվող այն լուրերին, որ Վրաստանի հասարակության շրջանում աճել են ռուսաստանամետ տրամադրությունները, ժողովրդավարական շարժման առաջնորդը նշել է, որ եթե լսենք այդ կանխատեսումներին, ապա կարելի է կարծել, թե Վրաստանի բնակչության մեծ մասը ցանկանում է անդամակցում Եվրասիական տնտեսական միությանը:
«Հարցումների տվյալների համաձայն, Վրաստանում հարցման ենթարկվածների 31%-ը համաձայն է հենց վաղը անդամակցել Եվրասիական տնտեսական միությանը: Ես կարծում եմ, որ կա որոշակի մոլորություն, որմ առկա է նաև Ռուսաստանի բարձրագույն ղեկավարության շրջանում, որտեղ համոզված են, որ Վրաստանի բնակչության մեկ երրորդը ռուսամետ է: Դա այդպես չէ: Նախ, ես կարծում եմ, որ բուն ռուսամետ տերմինը ճիշտ չէ, ցանկանալ լինել Ռուսաստանի բարեկամը` մեկ բան է, իսկ այն, ինչ ենթադրում է «ռուսամետ» տերմինը` միանգամայն այլ բան, ինչ վերաբերում է այն մարդկանց, որոնք ցանկանում են Ռուսաստանի հետ բարեկամ լինել և ունենալ նորմալ հարաբերություններ, ապա այստեղ իրոք տոկոսը շատ բարձր է: Երկրորդ, ես կարծում եմ, որ յուրաքանչյուր ողջախոհ մարդ հասկանում է, որ հարևանների հետ հարկավոր է բարեկամություն անել, առավել ևս` այն հարևանների հետ, որոնք բավականին լուրջ ուժ ունեն», - նշել է Բուրջանաձեն: Եվ այդ համատեքստում նա հավելել է, որ Վրաստանի բնակչության բավականին մեծ տոկոսը կարծում է, որ Ռուսաստանից սպառնալիք է բխում , և դրանից հարկավոր է ձերբազատվել պրակտիկ գործողություններով, քայլ առ քայլ, այլ ոչ թե մերկախոս հայտարարություններով:
Հիշեցնենք, որ Վրաստանում խորհրդարանական ընտրությունները կընթանան հոկտեմբերին: Ընտրություններին մասնակցող կուսակցությունների վերջնական թիվն առայժմ չի որոշվել: Հարցումների արդյունքների համաձայն, երկրի բնակչության 60%-ից ավելին դեռ չի կողմնորոշվել, թե արդյոք մասնակցելու է ընտրությանը և ում օգտին է քվեարկելու:
Լրագրողների այցը Վրաստան կազմակերպել էին Go Group Media-ն և JAMnews մեդիա-պլատֆորմը: