Արմինֆո.Ռուսաստանի Պետդումայի պատգամավոր Կոնստանտին Զատուլինը պատասխանել է «Ղարաբաղ» կոմիտեի նախագահ, Հայաստանի Հանրապետության առաջին վարչապետ, Հայաստանի Հանրապետության պաշտպանության նախարար (1992-1993 թթ.) Վազգեն Մանուկյանի բաց նամակին
«Հարգելի Վազգեն Միքայելովիչ, Չեմ կարող չպատասխանել Ձեր նամակին https://ankakh.com/ru/article/154839): Տարբերություն չկա՝ բաց է այն, թե ոչ, ամեն դեպքում Ձեր նամակը վերաբերում է ամենաթանկին՝ ռուս և հայ ժողովուրդների հարաբերությունների հետ կապված իմ հավատին:
Այդ երկու քրիստոնյա ժողովուրդները շատ տառապանքներ են կրել իրենց պատմության ընթացքում: Եվ Քրիստոսի պես շարունակում են տառապել: Հարյուրավոր տարիներ մենք միասին ենք եղել և՛ ուրախության, և՛ վշտի պահերին: Բայց այժմ թե՛ մեզ մոտ, թե՛ ձեզ մոտ կշիռ են ձեռք բերում մարդիկ, որոնց համար դա կարևոր չէ:
Դուք կշտամբում եք Ռուսաստանին այն հարցում, որ նրա պահվածքը, սկսած 2020 թվականից, «չի համապատասխանում «դաշնակից» հասկացությանը», համարում եք, որ Ղարաբաղից մեր զինված ուժերի դուրսբերումը «վերջին կետն է դնում i-ի վրա»: Դա օտար տառ է, մեր այբուբեններում դա չկա: Դուք, իհարկե, գիտեք, որ ես և ինձ նման համախոհները Ռուսաստանում առնվազն չենք ցանկացել նման վերջաբան մեր խաղաղապահ գործողությանը Ղարաբաղում: Բայց նախ հայերի, այնուհետև ռուսների հեռանալը Ղարաբաղից, այն ամենից հետո, ինչ տեղի ունեցավ 2020 թվականից և հատկապես 2022-2023 թվականներին, կանխորոշված էր:
Սա դառը ճշմարտություն է: Եվ ես չեմ ցանկանում համառոտ նամակում թվարկել պատճառներն ու առիթները՝ կրկնելով Ձեզ և հավելելով իմը: Գրիբոյեդովներ ու Բաղրամյաններ չհայտնվեցին ճիշտ ժամանակին՝ ճիշտ տեղում: Ես էլ կարող էի այսօրվա Ռուսաստանին Ձեր հանդիմանությանը հակադարձել՝ հանդիմանելով այսօրվա Հայաստանին, բայց չեմ ուզում։
Ես ուզում եմ փրկել այն, ինչ մնացել է մեր ժողովուրդների հարաբերություններում, որպեսզի դրանք զոհ չդառնան պետությունների ու կառավարությունների քաղաքականությանը:
Ես չէ, որ պիտի ասեմ Ձեզ, թե ինչեր են լինում քաղաքականության մեջ: Բայց մի շտապեք թաղել հույսը, կասկածի տակ մի դրեք իմ և Ձեր հավատը. դա է Հայաստանի և Ռուսաստանի ապագայի գրավականը:
Ակնկալում եմ, ինչպես միշտ, Ձեր ըմբռնումը: Հարգանքով՝ Կոնստանտին Զատուլին, Ռուսաստանի Պետդումայի պատգամավոր, որ երբեք վարչապետ և պաշտպանության նախարար չի եղել», - ասվում է Վազգեն Մանուկյանի ֆեյսբուքյան էջում զետեղված նամակում:
Ավելի վաղ ՌԴ Պետդումայի պատգամավոր Կոնստանտին Զատուլինին հղված Վազգեն Մանուկյանի բաց նամակում, մասնավորապես, ասվում էր, որ Ռուսական զինված ուժերի դուրսբերումը Լեռնային Ղարաբաղից վերջին կետն է դնում «i»-ի վրա։ «Նույնիսկ հաշվի առնելով Ուկրաինայի հետ կապված Ռուսաստանի խնդիրները, անգամ նկատի առնելով այն հանգամանքը, որ Հայաստանի ղեկավարը ոչ ադեկվատ մարդ է, 2020 թվականից ի վեր Ռուսաստանի պահվածքը, իմ կարծիքով, չի համապատասխանում դաշնակցի հասկացություններին։ Անկախ այն բանից, թե ինչով կավարտվի Ուկրաինայում դիմակայությունը, Ռուսաստանն այստեղ արդեն տանուլ է տվել ձեզ համար ավելի նշանակալից պատերազմը՝ աշխարհի բոլոր ժողովուրդներին ցույց տալով ձեր դաշնակցության «հուսալիությունը», ճանապարհ է բացել և ոգեշնչել պանթյուրքական շարժմանը, որը կորստաբեր է ինչպես մեզ, այնպես էլ Ռուսաստանի համար։ Դոմինոյի առաջին քարն արդեն ընկել է։ Սրտիս ցավով եմ գրում եմ Ձեզ՝ որպես սեփական երկրի իսկական հայրենասերի և որպես Հայաստանի հավատարիմ բարեկամի, ով հասկանում է Լեռնային Ղարաբաղում տեղի ունեցածի բոլոր հետևանքները», - ասվում էր Վազգեն Մանուկյանի նամակում