Երեթշաբթի, 1 Դեկտեմբերի 2020 13:16

Արմինֆո.Ադրբեջանի նախագահ Իլհամ Ալիևը բացահայտել է Լաչինի միջանցքի շուրջ բանակցությունների մանրամասները։

 

Ըստ «Ազերթաջի»՝ Ալիևն ազգին ուղղված իր ուղերձում այսօր տեղեկացրել է, որ Բաքվի հայտարարության նախնական տարբերակում առաջարկվում էր, որ Լաչինի միջանցքի լայնությունը կկազմի 30 կմ: "Ես կտրականապես դեմ էի դրան և ասացի, որ հայկական կողմի այդ նկրտումները բացարձակապես անհիմն են։ Միջանցքի շրջանակներում անվտանգության միջոցների ապահովման համար նման լայն միջանցքի անհրաժեշտություն չկա։ Դրա համար ես դա բացարձակապես անընդունելի առաջարկ եմ համարել և իմ կարծիքն եմ հայտնել։ Այնուհետեւ երկրորդ տարբերակում նախատեսվում էր, որ Լաչինի միջանցքի լայնությունը կկազմի 10 կիլոմետր: Ես դրան էլ համաձայնություն չեմ տվել, և արդյունքում՝ պայմանավորվածություն է ձեռք բերվել 5 կմ լայնությամբ միջանցքի շուրջ։ 5 կմ լայնությամբ միջանցքը բավական հեռավորություն է ընդգրկում և մեզ համար, և Լեռնային Ղարաբաղում բնակվող հայերի համար, և անվտանգության ապահովման համար։ Պետք է ասեմ նաև, որ երկար ժամանակ՝ շուրջ 30 տարի ընթացող բանակցություններում Լաչինի շրջանն Ադրբեջանին վերադարձնելու հարցը, հատկապես Լաչինի միջանցքի հետ կապված հարցը, միշտ քննարկվել է՝ որպես շատ կարևոր և առանձին թեմա։ Հայկական կողմն, ընդհանրապես, կարծում էր, որ Լաչինի ողջ շրջանը պետք է իրենց տրվի՝ որպես միջանցք։ Ցավոք, որոշ արևմտյան շրջանակներ աջակցում էին այդ դիրքորոշմանը։ Իսկ դա էլ ավելի անհանդուրժողական էր դարձնում Հայաստանի դիրքորոշումը, և, կարելի է ասել, որ թշնամին լիովին գոտեպնդվել էր։ Արդյունքում՝ հենց Լաչինի շրջանում բնակեցման շատ լուրջ քաղաքականություն է իրականացվել։ Այնտեղ հազարավոր մարդիկ էին ապրում։ Որոշ տվյալներով ՝ այնտեղ ապրում էր, հնարավոր է, մոտ 10 հազար մարդ։ Այսինքն ՝ Հայաստանի ղեկավարությունը չէր էլ մտածում Ադրբեջանին վերադարձնել Լաչինի շրջանը։ Երբ բանակցությունների ընթացքում մենք անդրադառնում էինք Լաչինի միջանցքի հետ կապված թեմաներին, թե Հայաստանը, թե նրա հովանավորները միշտ նշում էին, որ, ոչ, Լաչինի շրջանը առանձին թեմա է։ Թեև մեզ ուղղակիորեն չէր ասվել, բայց միշտ եղել է այնպիսի կարծիք, որ Լաչինի շրջանը պետք է որևէ ձևով մնա Հայաստանում", - ասել է Ալիևը։

 

Նշենք, որ նոյեմբերի 9-ի՝ լույս 10-ի գիշերը ՌԴ եւ Ադրբեջանի նախագահների եւ Հայաստանի վարչապետի կողմից ստորագրված տխրահռչակ հայտարարության համաձայն, ղարաբաղյան հակամարտության գոտում մարտական գործողությունները լիովին դադարեցվել են: Համաձայն այդ պայմանավորվածության 6-րդ կետի՝ Հայաստանի Հանրապետությունը մինչև 2020 թվականի դեկտեմբերի 1-ը Ադրբեջանին է հանձնումմ Լաչինի շրջանը ։ Լաչինի միջանցքը (5 կմ լայնությամբ), որն ապահովելու է Լեռնային Ղարաբաղի կապը Հայաստանի հետ եւ միեւնույն ժամանակ չի շոշափելուՇուշին, մնում է Ռուսաստանի Դաշնության խաղաղապահ զորակազմի վերահսկողության տակ:

 

Հարկ է նաև նշել, որ Բերձորի քաղաքապետ Նարեկ Ալեքսանյանը, խոսելով իրավիճակի մասին, հաղորդել է, որ շատ բնակիչներ շարունակում են մնալ քաղաքում։ "Երեկ ռուս խաղաղապահները հայտարարել են, որ քաղաքում կողմերից ոչ մեկի դրոշներ չպետք է լինեն։ Այդ պատճառով իջեցվել է Արցախի Հանրապետության դրոշը։ Սակայն ռուս խաղաղապահները չեն հստակեցրել, թե արդյոք ադրբեջանական զինված ուժերը կմտնեն Բերձոր։ Անվտանգության նկատառումներից ելնելով՝ հնարավոր է, որ կանայք ու երեխաները Բերձորից դուրս են եկել, բայց շատերը մնացել են։ Ինչ վերաբերում է երեկվանից շրջանառվող լուրերին, թե քաղաքում պետք է մնան ընդամենը 200 մարդ՝ որպես խաղաղապահներին սպասարկող անձնակազմ, ապա ես այդ մասին տեղեկություն չունեմ։ Համենայն դեպս, այս պահին քաղաքում ավելի քան 200 բնակիչ կա ։ Անձամբ՝ ես, նույնպես Բերձորում եմ։ Առայժմ ոչ մի խնդիր չի առաջացել։ Ներկայում Բերձորում տեղակայված են ռուս խաղաղապահներ, բնակիչները սպասում են իրադարձությունների հետագա զարգացմանը", - նշել է նա։