Արմինֆո.Կա շուրջ 80 հայ ռազմագերի, որոնց առկայությունը Ադրբեջանի իշխանությունները մինչ օրս չեն ճանաչում։ Այդ մասին սեպտեմբերի 27-ին կայացած մամուլի ասուլիսի ժամանակ հայտարարել է Մարդու իրավունքների եվրոպական դատարանում հայ ռազմագերիների շահերի ներկայացուցիչ Սիրանուշ Սահակյանը։
Նրա խոսքով՝ Արցախում 44-օրյա պատերազմի արդյունքում 156 ռազմագերիներ վերադարձվել են Ադրբեջանի կողմից, սակայն դեռ կան շատ քաղաքացիներ, որոնք մինչ օրս գտնվում են հարևան հանրապետությունում: "Մինչեւ սեպտեմբերի 13-ը պատերազմն Ադրբեջանում պաշտոնապես կար 33 ռազմագերի, իսկ հետպատերազմյան շրջանում գերեվարման եւս 20 նոր դեպք է գրանցվել", - նշել է Սիրանուշ Սահակյանը:
Նա ընդգծել է, որ իրավապաշտպան կազմակերպությունների աշխատանքը տարվում է անհատական բողոքների հիման վրա, սակայն Եվրոպական դատարանում ընթանում է միջպետական գործընթաց: Սահակյանը նշել է, որ ռազմագերիների հարցով իրավական ջանքերը բավականին ինտենսիվ են եղել: "Որոշ դեպքերում, նույնիսկ, աննախադեպ է, քանի որ Հայաստանը նախկինում ձեռնպահ է մնացել որեւէ պետության դեմ միջպետական գործեր հարուցելուց, թեեւ մենք ունեցել ենք միջպետական բնույթի գործեր անհատական ջանքերով, բայց առաջին անգամ պետությունն ինքն է ակտիվություն ցուցաբերում միջազգային իրավական ատյաններում", - նշել է իրավապաշտպանը, հավելելով, որ միակ բացը, որը կարելի է լրացնել դատական գործընթացում, դա ՄԱԿ-ի՝ պատանդառության դեմ պայքարի մասին միջազգային կոնվենցիային երկրի միանալու գործընթացի նախաձեռնումն է, քանի որ իրադարձությունները ցույց տվեցին, որ հայ ռազմագերիները դադարել են լինել, պարզապես, գերիներ, նրանց պահում են որպես պատանդ և օգտագործում են որպես Հայաստանի նկատմամբ ճնշումը խստացնելու միջոց, իսկ նրանց հայրենադարձությունն ուղղակիորեն կապված է քաղաքական բնույթի հարցերի լուծման հետ։