Արմինֆո. ՀՀ գլխավոր դատախազ Արթուր Դավթյանի հանձնարարությամբ հետախուզման մեջ գտնվող Ռուբեն Հայրապետյանի՝ այլ երկրի քաղաքացի հանդիսանալու պայմաններում ՀՀ ԱԺ պատգամավորի թեկնածու առաջադրվելու իրավաչափության վերաբերյալ մամուլի համապատասխան հրապարակումներն ուղարկվել են ՀՀ քննչական կոմիտե,
այնտեղ վերջինիս վերաբերյալ քննվող քրեական գործի շրջանակներում այդ հանգամանքները քննարկման առարկա դարձնելու, դրանցում ՀՀ քրեական օրենսգրքով նախատեսված հանցավոր արարքների հատկանիշների առկայությունը պարզելու նպատակով: Այս մասին Facebook-ի իր էջում գրել է դատախազի խորհրդական Գոռ Աբրահամյանը ։
<Դատախազությունը հետամուտ կլինի քննությամբ ձեռք բերված արդյունքերից ելնելով՝ համապատասխան իրավական գնահատական տալու հարցում>,- ընդգծել է նա։
Հավելենք, որ ավելի վաղ մի շարք լրատվամիջոցներ, վկայակոչելով դատախազությանը, հայտնել էին, որ Ռուբեն Հայրապետյանը 2003 թվականից Ռուսաստանի քաղաքացի է: Մինչդեռ 2003-2012թթ. եղել է ՀՀ ԱԺ պատգամավոր և նույնիսկ գլխավորել է ֆինանսավարկային, բյուջետային և տնտեսական հարցերի մշտական հանձնաժողովը։