ՙԵս կրկնում եմ, այսօր մեզ նպատակահարմար է ասել, որ ապրիլյան պատերազմի ընթացքում կորցրած 800 հա-ն ռազմավարական նշանակություն չունեցող ամայի տարածք է՚,- ԱրմԻնֆո-ի թղթակցի հետ զրույցում հայտարարել է Հանրապետական կուսակցության խմբակցության ղեկավար Վահրամ Բաղդասարյանը՝ անդրադառնալով Հայաստանի պաշտպանության նախարար Սեյրան Օհանյանի հայտարարությանը, որ այդ տարածքներն ամրագրված են Արցախի տարածքներում, և դրանց վերադարձը պետք է քննարկվի բանակցությունների ընթացքում:
Ավելի վաղ Բաղդասարյանն այդ տարածքներն անվանել էր ՙռազմավարական նշանակություն չունեցող ամայի տարածք՚, ինչը հասարակական-քաղաքական բացասական արձագանք է գտել: Բաղդասարյանի այս հայտարարությունը մեկնաբանելով՝ Սեյրան Օհանյանը լրագրողների հետ զրույցում հայտարարել է, որ այդ 800 հա-ն ամրագրված են Արցախի տարածքներում, և դրանք չենք կարող մոռանալ, և այդ հարցը պետք է բանակցությունների ընթացքում քննարկումների առարկա դառնա:
Սակայն, պաշտպանության նախարարի խոսքերը չեն համոզել Բաղդասարյանին, և նա շարունակում է ՙամայի և չմշակվող՚ համարել այդ տարածքները՝ իր դիրքորոշումը բացատրելով հետևյալ կերպ. ՙԵս դիտավորյալ եմ այդ տարածքներն ամայի անվանում, որպեսզի բռնակալ Ալիևն իրեն հաղթող չերևակայի, և չմտածի, թե ինչ-որ ռազմավարական կարևոր տարածքներ է վերցրել՚: Այնուամենայնիվ, Բաղդասարյանը գտնում է, որ հնարավորության դեպքում այդ ՙռազմավարական նշանակություն չունեցող տարածքները պետք է վերադարձվեն՝ լինի դա ռազմական ճանապարհով, եթե հանկարծ պատերազմ սկսվի, կամ բանակցությունների միջոցով, եթե դրանք վերսկսվեն՚:
Նշենք, որ ապրիլյան պատերազմի ընթացքում հայկական կողմի տարածքային կորուստների մասշտաբների մասին առաջին անգամ խոսեց ղարաբաղյան պատերազմի հերոս Ժիրայր Սեֆիլյանը՝ նշելով 700 հա կորցրած տարածքի մասին: Սակայն, կառավարող կուսակցության և տարբեր պետական կառույցների ներկայացուցիչներ սկսեցին հերքել այդ հայտարարությունը, մինչև ՀՀ նախագահ Սերժ Սարգսյանը հստակ նշեց կորցրած 800 հա տարածքի մասին, ինչը, ըստ պետության ղեկավարի, ՙռազմավարական նշանակություն չունի՚: ՀՀԿ խմբակցության ղեկավար Վահրամ Բաղդասարյանը զարգացրեց այդ միտքը՝ ՙամայի՚ տարածք անվանելով դրանք: Ի պատասխան՝ անսպասելի հայտարարությամբ հանդես եկավ ՀՀ պաշտպանության նախարար Սեյրան Օհանյանը, ով հավաստիացրեց, որ այդ այդ 800 հա-ն ՙամրագրված են Արցախի տարածքներում, և դրանք չենք կարող մոռանալ, և այդ հարցը պետք է բանակցությունների ընթացքում քննարկումների առարկա դառնա՚:
ԱրմԻնֆո-ի խնդրանքով մեկնաբանելով Օհանյանի այս հայտարարությունը և պատասխանելով այն հարցին, թե արդյոք 800 հա-ն Արցախի տարածք են հանդիսացել, թե, այնուամենայնիվ, բուֆերային գոտի են, ինչպես ավելի վաղ հայտարարվել էր՝ ԼՂՀ նախագահի մամուլի քարտուղար Դավիթ Բաբայանն ընդգծել է. ՙԱյդ տարածքների մեծ մասը, կրկնում եմ՝ մեծ մասը, բայց ոչ ամբողջը, գտնվել է բուֆերային գոտում՚: