Սյունիքի մարզպետ Սուրիկ Խաչատրյանի նկատմամբ մահափորձի փաստի առնչությամբ ձերբակալված Արա Բուղադյանին առայժմ մեղադրանք չի առաջադրվել: Այդ մասին ԱրմԻնֆո-ի թղթակցի հետ զրույցում հայտարարել է նրա փաստաբան Հայկ Ալումյանը:
Նա ընդսմին նշել է, որ Բուդաղյանը կասկածվում է Սուրիկ Խաչատրյանի նկատմամբ մահափորձի կազմակերպման համար: «Այսօր ես հանդիպել են պաշտպանյալիս հետ: Ընդգծում եմ, որ Բուդաղյանը ոչ մի մեղք չի գործել, և կասկածները միանգամայն անհիմն են», - նշել է Ալումյանը:
Նշենք, որ հուլիսի 3-ին Ազգային անվտանվության ծառայության տարածած հաղորդագրությունում նշվում է, որ ՀՀ Սյունիքի մարզպետ Սուրիկ Խաչատրյանի և նրա ուղեկիցների նկատմամբ 2015թ. մայիսի 20-ին ժամը 18:15-ի սահմաններում հրազենի գործադրմամբ սպանության փորձ կատարելու դեպքի առթիվ իրականացվող նախաքննության ընթացքում ՀՀ ԱԱԾ մարմինների կողմից ձեռնարկված օպերատիվ-քննչական գործողությունների արդյունքում, նշված հանցագործությանն առնչակից լինելու կասկածանքով, հուլիսի 3-ին ձերբակալվել են ՀՀ Սյունիքի մարզի Կապան քաղաքի բնակիչներ՝ Գարեն Ռոմիկի Աթաջանյանը , Հենրիկ Շահենի Ավագյանը և Գորիս քաղաքի բնակիչներ՝ Վիտալի Վլադիմիրի Մինասյանը և Արա Էմիլի Բուդաղյանը: Այս մասին հայտնում են ԱԱԾ Քննչական վարչությունից:
«Օրենքով սահմանված կարգով կատարված խուզարկությունների արդյունքում ձերբակալված անձանց պատկանող բնակարաններից, այլ շինություններից հայտնաբերվել է մեծ քանակությամբ զենք և ռազմամթերք, այդ թվում՝ «ԱԿ-74» տեսակի 5. 45 մմ տրամաչափի ինքնաձիգ՝ փամփշտատուփերով և փամփուշտներով:
Ներկայումս իրականացվում են ձերբակալման համար հիմք հանդիսացած կասկածանքի հաստատմանը կամ հերքմանը, ինչպես նաև քրեական գործով պարզաբանման ենթակա այլ հանգամանքների ստուգմանն ուղղված տարաբնույթ քննչական և օպերատիվ գործողություններ: Դեպքի վայրում հայտնաբերված գնդակների ու պարկուճների և առգրավված զենքի նույնականությունը պարզելու համար նշանակվել են փորձաքննություններ, ասվում է ԱԱԾ հաղորդագրությունում:
Ինչպես ավելի վաղ հաղորդվել է, մայիսի 20-ին Գորիս-Կապան ճանապարհին Սուրիկ Խաչատրյանի մեքենայի գնդակոծության հետևանքով ոչ ոք չի տուժել: Հիշեցնենք, որ 2013 թվականի հունիսի 2-ին Սյունիքի մրազպետի տան մոտ սպանվել էր Ավետիք Բուդաղյանը: Նրա եղբայրը` ԼՂՀ զորամասերից մեկի հրամանատար Արտակ Բուդաղյանը, ծանր վիրավորում էր ստացել: Վիրավորում էր ստացել նաև մարզպետի ազգական և թիկնապահ Նիկոլայ Աբրահամյանը: Կալանավորվել, սակայն, շուտով ազատ էին արձակվել մարզպետի թեկնապահ Զարզանդ Նիկողոսյանը և մարզպետի որդին` 19-ամյա Տիգրանը, որը վերջերս հերթական անգամ հայտնվել է սլկանդալի կենտրոնում, սակայն այդպես էլ պատիժ չի կրել: Միջադեպից հետո Սուրիկ Խաչատրյանը հայտարարել էր, թե ժամանակավորապես վայր է դնում մարզպետի լիազորությունները` մինչև նախաքննության ավրատը, թեև երկրի օրենսդրությամբ նման գործողություններ չեն նախատեսվում: Իսկ հունիսի 6-ին կառավարությունը նրան պաշտոնանկ էր արել: 2014 թվականի սեպտեմբերի 25-ին կառավարությունը Սյունիքի մարզը երկրորդ անգամ վստահեց Սուրիկ Խաչատրյանին: