ՙՀամախմբում՚ կուսակցությունը խոր մտահոգություն է հայտնում քաղաքացիների և ոստիկանության ուժերի բախման կապակցությամբ: Այդ մասին ասվում է ՙՀամախմբում՚ կուսակցության՝ ԱրմԻնֆո ստացված հայտարարության մեջ:
ՙԽաղաղ քաղաքացիների ինքնաբուխ հավաքն անսպասելիորեն վերածվեց ընդհարման, որի հետևանքով կան տուժածներ և վիրավորներ: Երեկ գիշերվանից շրջանառվում է այն վարկածը, համաձայն որի՝ խաղաղ հավաքի ժամանակ գործել են նախապես պատրաստված սադրիչ խմբեր, որոնք հրահրել են
ընդհարումը:
Մենք պահանջում ենք իրավապահ կառույցներից կարճ ժամկետում հիմնավոր փաստերով հերքել այդ խմբերի և ոստիկանության կապը, ինչի մասին վարկածը շրջանառվում է հասարակության մեջ։
ՀԱՄԱԽՄԲՈՒՄ կուսակցությունը կրկին փաստում է, որ արդեն հինգերորդ օրն է` երկրի քաղաքական ղեկավարությունը՝ նախագահը, ԱԺ նախագահը, վարչապետը, ցուցաբերում են քաղաքակիրթ աշխարհում նախադեպը չունեցող պահվածք և հրաժարվում են այս լարված պահին հանդես գալ հրապարակային հայտարարությամբ, իրավիճակի իրենց գնահատականով և խոսել ժողովրդի հետ:
Երկրի քաղաքական ղեկավարության՝ ժողովրդից ինքնամեկուսացման պայմաններում մեծանում է ցուցարարների և իրավապահների միջև բախումների
հավանականությունը: Հետևաբար, իշխող քաղաքական վերնախավն իր այս պահվածքով կրում է ուղղակի պատասխանատվություն:
Մի քանի օր շարունակվող ոստիկանական բռնարարքները, խաղաղ քաղաքացիների անձի և արժանապատվության ոտնահարումները ստեղծում են պայթյունավտանգ մթնոլորտ և հղի են անկանխատեսելի զարգացումներով:
Սա ժողովրդի և ոստիկանության հակամարտություն չէ, և չի կարելի թույլ տալ նման տրամադրությունների զարգացում: Միևնույն ժամանակ, մենք վստահ ենք, որ հենց քաղաքական իշխանության իներտ և անհասկանալի վարքագիծն է նման իրավիճակի պատճառը:
Մենք կոչ ենք անում ոստիկանությանը դադարեցնել խաղաղ քաղաքացիների նկատմամբ հինգ օր շարունակ իրականացվող բռնությունները, որոնց մասին կան բազմաթիվ արձանագրված փաստեր:
ՀԱՄԱԽՄԲՈՒՄ կուսակցությունը կրկին կոչ է անում քաղաքական ուժերին մի կողմ թողնել նեղ կուսակցական հավակնությունները և համատեղել ջանքերը՝ ունենալով մեկ օրակարգ՝ թույլ չտալ իրավիճակի սրում, թույլ չտալ բախումներ, գտնել քաղաքական ելքեր իրավիճակից՚,- ասված է հայտարարության մեջ:
Մինչդեռ երկարատև լռությունից հետո այսօր իշխանությունները, վերջապես, արձագանքել են ՊՊԾ գնդի շենքի գրավումից հետո Երևանում ստեղծված իրավիճակին: «Այն, ինչ տեղի է ունեցել հուլիսի 17-ին, անթույլատրելի է և դատապարտելի, քանի որ բռնության միջոցով անհնար է հասնել իրական փոփոխությունների», - հայտարարել է Հովիկ Աբրահամյանը` հուլիսի 21-ին կառավարության նիստում: Ընդ որում` վարչապետը հավաստիացրել է, որ ստեղծված իրավիճակը մտահոգություն է հարուցում, և իշխանությունն ամեն ինչ անում է իրավիճակի խաղաղ հանգուցալուծման համար: Կառավարության ղեկավարը, միևնույն ժամանակ, «անընդունելի և անհեռանկար» է որակել զինված խմբի սկսած գործընթացը: