Հայ-ռուսական ռազմատեխնիկական համագործակցության ընդլայնումը`Գաբալայի ՌՏԿ շուրջ անհաջող բանակցությունների լույսի ներքո, շատ պատեհաժամ քայլ է

• Հինգշաբթի, 9 օգոստոսի, 18:18

Հայ-ռուսական ռազմատեխնիկական համագործակցության ընդլայնումը`Գաբալայի ՌՏԿ շուրջ անհաջող բանակցությունների լույսի ներքո, շատ պատեհաժամ քայլ է Երևանի և Մոսկվայի կողմից: Այդ մասին այսօր մամլո ասուլիսի ժամանակ հայտարարել է ՙԵվրոպական ինտեգրացիա՚ հասարակական կազմակերպության նախագահ, քաղաքագետ Կարեն Բեքարյանը: Փորձագետի կարծիքով, այսօր, ըստ երևույթին, Ռուսաստանի և Ադրբեջանի միջև բանակցությունները փակուղի են մտնում` կայանի օգտագործման վարձավճարը ներկայիս տարեկան $7մլն-ից $300 մլն բարձրացնելու Բաքվի ֆանտաստիկ պահանջների պատճառով:

Բեքարյանի խոսքով, եթե այդ հանգամանքից ավելացնենք նաև  տեղեկատվությունը, թե Ադրբեջանը նման կայան է ցանկանում կառուցել Արևմուտքի հետ միասին, ապա Երևանի հետ համագործակցության ակտիվացումը Մոսկվայի համար խիստ ակտուալ է դառնում:

Միաժամանակ քաղաքագետն ընդգծել է, որ Հայաստանի և Ռուսաստանի միջև համագործակցությունը ոչ մի դեպքում չպետք է խոչընդոտ դիտարկվի մեր երկրի եվրաինտեգրման ճանապարհին: ՙՀայաստանը հասուն և կշռադատված քաղաքականություն է իրականացնում: Եվ պետք չէ կեղտոտ ջրում ձուկ բռնել: Պետք է հասկանալ, որ կարելի է և հարկավոր է լավ հարաբերություններ կառուցել Արևմուտքի հետ և միաժամանակ ամրապնդել ռազմավարական գործընկերությունը Մոսկվայի հետ՚,- ընդգծել է փորձագետը:

Նախագահ Սերժ Սարգսյանը Ռուսաստանի Դաշնություն կատարած աշխատանքային այցի շրջանակում նախօրեին Մոսկվայում հանդիպում է ունեցել ՌԴ նախագահ Վլադիմիր Պուտինի հետ: Սերժ Սարգսյանը, մասնավորապես, նշել է հաջող ռազմատեխնիկական համագործակցությունը: ՙ2010թ. մենք երկարացրեցինք Հայաստանում ռուսական ռազմաբազայի տեղակայման ժամկետը: Մենք համարում ենք, որ ռուսական ռազմաբազայի ներկայությունը Հայաստանում ելնում է մեր անվտանգության շահերից: Աշնանը Հայաստանում կընթանան ՀԱՊԿ զորավարժությունները: Ընդհանուր առմամբ, ես համարում եմ, որ մեր հարաբերությունների խորացման միջոցով մենք կարող ենք նպաստել Կովկասում խաղաղության և անվտանգության ամրապնդմանըե,-ՌԴ նախագահի հետ հանդիպմանն ասել է նախագահ Սերժ Սարգսյանը: