Երեթշաբթի, 24 Նոյեմբերի 2015 15:07

Ավարտվել է Գորիսի «Սդղի գյոլ՚ կոչվող տարածքում Զաքարյան եղբայրների նկատմամբ կիրառված բռնությունների դեպքի առթիվ հարուցված քրեական գործի նախաքննությունը

 

 

ՀՀ քննչական կոմիտեի հատկապես կարևոր գործերի քննության գլխավոր վարչությունում ավարտվել է Հարություն և Մուշեղ Զաքարյան եղբայրների նկատմամբ կիրառված բռնությունների դեպքի առթիվ հարուցված քրեական գործի նախաքննությունը: Քննությամբ ձեռք բերված ապացույցների հիման վրա մեղադրանք է առաջադրվել 6 անձի:

 

Նախնական քննությամբ հիմնավորվել  է, որ Զաքարյան եղբայրներին մարմնական վնասվածքները պատճառվել են Գորիսի «Սդղի գյոլ՚ կոչվող տարածքում տեղի ունեցած վիճաբանության ժամանակ։

 

Պարզվել է, որ 2015 թվականի մայիսի 2-ին՝ ժամը 15-ի սահմաններում, Գորիս քաղաքի Անկախության փողոցում տեղի է ունեցել ավտովթար. միմյանց են բախվել երկու ավտոմեքենա, որի հետևանքով վնասվել է Մ.Զաքարյանի վարած ավտոմեքենայի կողային հայելին։ Նշված հարցի կապակցությամբ պարզաբանումներ կատարելու նպատակով միջադեպի մասնակիցները, ըստ ձեռք բերված պայմանավորվածության, նույն օրը՝ ժամը 17-ի սահմաններում, հանդիպել են Գորիսի «Սդղի գյոլ՚ կոչվող տարածքում: Առաջացած վիճաբանության ժամանակ մի խումբ անձանց կողմից բռնություն է գործադրվել Մուշեղ և Հարություն Զաքարյանների նկատմամբ:

 

Ծեծի ընթացքում միասնական դիտավորությամբ, մեկը մյուսին լրացնելով, հարվածներ են հասցվել Մ.Զաքարյանին՝ պատճառելով միջին ծանրության վնաս։ Ձեռք բերված ապացույցների համաձայն՝ Յու.Մանուչարյանը ձեռքերով և ոտքերով հարվածներ է հասցրել Մ.Զաքարյանի մարմնի տարբեր մասերին, դեմքին, ինչպես նաև՝ ավտոմեքենայի խլացուցիչով հարվածել վերջինիս գլխին։ Նրա նկատմամբ կիրառված բռնությանն անմիջական մասնակցություն են ունեցել նաև  Շ.Դավթյանը, Դ.Հակոբյանը, Ս. Է. և Մ.Խաչատրյանները, ովքեր նույնպես ձեռքերով և ոտքերով հարվածել են նրան, իսկ Մ.Խաչատրյանը նաև մահակով է հարվածել Մ.Զաքարյանի գլխին։

 

Մասնավորապես, Շ.Դավթյանը, Դ. Հակոբյանը և Մ. Խաչատրյանը նույնպես ձեռքերով և ոտքերով հարվածել են նրա դեմքին և մարմնի տարբեր մասերին, իսկ Մ.Խաչատրյանը նաև մահակով է հարվածել Մ.Զաքարյանի գլխին։ Սեյրան և Էյներ Խաչատրյանները ձեռքերով և ոտքերով հարվածներ են հասցրել Մուշեղ Զաքարյանի մարմնի տարբեր մասերին:

 

Բացի այդ, քննության տվյալներով, նշված ծեծկռտուքի ժամանակ Յ.Մանուչարյանը ոտքով երկու անգամ հարվածել է Հ.Զաքարյանի դեմքին: Առաջին հարվածը հասցրել է Հարություն Զաքարյանի ճակատային աջ հատվածին, երկրորդը՝ աջ աչքին, որն ուղեկցվել է աջ աչքի տեսողության կորստով: Արդյունքում՝ Մուշեղ Զաքարյանի առողջությանը պատճառվել է միջին ծանրության, իսկ Հարություն Զաքարյանի առողջությանը՝ ծանր վնաս։

 

Մինչդատական վարույթում ձեռք բերված ապացույցների համակցությամբ՝ Յուրի Մանուչարյանին մեղադրանք  է առաջադրվել ՀՀ  քրեական օրենսգրքի 112-րդ հոդվածի 1-ին մասով և 113-րդ հոդվածի 2-րդ մասի 3-րդ կետով։

 

Դերենիկ Հակոբյանին, Շահում Դավթյանին, Մայիս, Էյներ և Սեյրան Խաչատրյաններին  մեղադրանք է առաջադրել ՀՀ քրեական օրենսգրքի 113-րդ հոդվածի 2-րդ մասի 3-րդ կետի հատկանիշներով:Քրեական գործը՝ մեղադրական եզրակացությամբ, ուղարկվել է նախաքննության օրինականության նկատմամբ հսկողություն իրականացնող դատախազին: Մեղադրական եզրակացությունը հաստատվել  է, և գործն ուղարկվել դատարան։ Նշենք, որ մայիսի 2-ին ՙՍդղի գյոլ՚ կոչվող տարածքում Սյունիքի մարզպետ Սուրեն Խաչատրյանի հարազատների մասնակցությամբ ծեծկռտուքի հետևանքով դաժան ձեծի են ենթարկվել Զաքարյան եղբայրները: Նրանցից մեկը՝ Հարությունը, զրկվել է աչքից: Գործի առնչությամբ ձերբակալվել էին Սուրեն Խաչատրյանի որդին, եղբայրը և եղբորորդին: Զաքարյաններն իրենց ցուցմունքներում նշել են, որ ծեծկռտուքին մասնակցել է նաև մարզպետի որդի Տիգրանը: Նա ձերբակալվել էր, սակայն շուտով նրա նկատմամբ դատական հետապնդումը կասեցվել էր: Ավելի վաղ Հարություն Զաքարյանը հայտարարել էր, որ իր աչքին հարվածել է Տիգրան Խաչատրյանը: Հետագայում, ինչպես երևում է ՔԿ նյութերից, նա փոխել է իր ցուցմունքները՝ հայտարարելով, որ Տիգրան Խաչատրյանը չի հարվածել իր աչքին: Մինչդեռ Զաքարյանների հայրը՝ Գագիկ Զաքարյանը, ԱրմԻնֆո-ի թղթակցի հետ զրույցում հայտարարել է, որ իրենք չեն փոխել իրենց ցուցմունքները: ՙԵթե նույնիսկ Տիգրան Խաչատրյանը չի հարվածել իմ որդու աչքին, նա մասնակցել է ծեծին, և պետք է պատասխանատվություն կրի՝ իր մեղքի չափով՚,- հայտարարել է Զաքարյանը: