Թեղուտի հանքավայրն անհանգստացնում է Վրաստանի կանաչներին

• Երկուշաբթի, 6 օգոստոսի, 11:47

 Թեղուտի հանքավայրն անհանգստացնում է նաև Վրաստանի կանաչներին:

Ինչպես ԱրմԻնֆո-ի  թղթակցի հետ զրույցում հայտարարել է Վրաստանի բնապահպանության նախկին նախարար, ՙՎրաստանի կանաչների շարժում/Երկրի բարեկամներ-Վրաստան՚ շարժման համանախագահ Նինո Չխոբաձեն, ՙցանկացած հանքավայր, որը շահագործվում է բաց եղանակով, մեծացնում է ջրային ռեսուրսների աղտոտման ռիսկերը: Թեղուտը կարող է կրկնել Մառնեուլի հանքավայրի ճակատագիրը, որն ունի լուրջ պատմական աղտոտում՚: Նրա խոսքով, երկար տարիներ բնապահպանները խորհուրդ չէին տալիս Մաշավերի գետի ջրերն օգտագործել ոռոգման նպատակով, և փորձագետների գնահատմամբ, դա իսկական էկոլոգիական աղետի պատճառ դարձավ Վրաստանում: Ըստ նրա, Թեղուտի շահագործման տեխնոլոգիան պետք է լինի ռեսուրսախնայող և ուղղված լինի ջրային ռեսուրսների պահպանմանը:

Փորձագետը նշել է կայուն զարգացման սկզբունքների ներդրմանն ուղղված քայլերի իրականացման, ինչպես նաև օրենսդրական մակարդակով տնտեսության կանաչապատման պայմանների սահմանման անհրաժեշտությունը` հավելելով, որ ՙՎրաստանի կանաչների շարժում/Երկրի բարեկամներ-Վրաստանը՚  միանում է վրացական և հայկական ոչ կառավարկան կազմակերպություններին, որոնք իրենց կառավարություններից պահանջում են միջոցներ իրականացնել Թեղուտի նախագծի բացասական ազդեցությունից շրջակա միջավայրը պահպանելու ուղղությամբ:

Հիշեցնենք, որ 2010 թվականի դեկտեմբերին տարածվել էր երկու երկրների էկոլոգների և կանաչ ակտիվիստների համատեղ հայտարարությունը, որում նշվում էր, որ Թեղուտի շահագործման ընթացքում թունավոր նյութերի` էկոհամակարգ ներթափանցման դեպքում անդառնալի վնաս կհասցվի ոչ միայն Հայաստանի, այլ նաև Վրաստանի տարածքին, քանի որ թափոնները կհայտնվեն անդրսահմանային Դեբետ գետում: Վրացական ոչ կառավարական կազմակերպություններն անհանգստություն են հայտնել նաև այն առնչությամբ, որ նախագիծը մշակելիս հաշվի չի առնվել հիշյալ արտադրության անդրսահմանային ազդեցությունը:

Միաժամանակ ՙՎալլեքս՚ ընկերությունների խումբը հայտարարում է, որ Թեղուտի հանքավայրի շահագործումն իրականացվելու է նորագույն տեխնոլոգիաների օգտագործմամբ, ինչը թույլ կտա նվազագույնի հասցնել բացասական ներգործությունն անմիջապես հարակից տարածքների էկոլոգայի վրա, իսկ անդրսահմանային ներգործությունը բոլորովին բացակայում է: Մասնավորապես, կառուցվող լեռնահարստացուցիչ կոմբինատում գործելու է արտադրական ջրերի փակ շրջանառու համակարգ, ինչը բացառում է դրանց ներթափանցումը շրջակա շրջային միջավայր: Բացի այդ, ընկերությունը շարունակում է անտառատնկման ծրագրի իրականացումը: Ներկայումս Թեղուտում հատվել է շուրջ 75 հա անտառ, մինչդեռ ծրագրի շրջանակներում ծառատունկ է իրականացվել ավելի քան 220 հա տարածքում: Թեղուտի նախագծում ՙՎալլեքս՚ ընկերությունների խմբի ներդրումների ընդհանուր փաթեթը կազմում է ավելի քան $320 մլն:

Թեղուտի պղնձամոլիբդենային հանքավայրի շահագործման ծրագիրը ՀՀ կառավարության հավանությանն է արժանացել 2007 թվականի նոյեմբերին: Հանքավայրը շահագործման կհանձնվի 2014 թվականին: