Արմինֆո. Ադրբեջանը պատմել է ԵԱՀԿ Երևանի գրասենյակի մանդատը երկարաձգելու որոշումը շրջափակելու դրդապատճառների մասին:
Ինչպես հաղորդում է «Թրենդը», 2016 թվականի դեկտեմբերի 31-ին ԵԱՀԿ մշտական խորհրդի հատուկ նիստում ԵԱՀԿ Երևանի բյուրոյի մանդատի երկարաձգման հարցի առնչությամբ Ադրբեջանը կազմակերպությանը տեղեկացրել է, որ չի պաշտպանում Երևանում ԵԱՀԿ բյուրոյի մանդատի գործողության ժամկետի երկարաձգման մասին որոշման նախագիծը, քանի որ ռազմաքաղաքական չափման մեջ դրա գործունեությունը խոր մտահոգության աղբյուր էր Բաքվի համար: «Մենք ընդգծել ենք, որ ԵԱՀԿ դաշտային առաքելության միջոցով Հայաստանին տրամադրվող օգնությունը ոչ մի դեպքում չպետք է կիրառվի Լեռնային Ղարաբաղում կամ ծառայի Հայաստանի կողմից «տարածքների օկուպացումը երկարաձգելուն»: Մենք նաև ընդգծել ենք, որ տեղերում այդ առաքելության գործունեությանը մեր աջակցությունը կախված կլինի տրամադրվող օգնության կամ ընդունող երկրի կողմից ձեռք բերվող ներուժն Ադրբեջանի անվտանգության օրինական շահերի նկատմամբ անիրավաչափ օգտագործման կանխարգելումից», - ասվում է հայտարարությունում, և այդ համատեքստում նշվում է, որ Բաքվի համար մտահոգության աղբյուր է դարձել, այն, որ վերջին տարիներին ԵԱՀԿ Երևանի գրասենյակը ներգրավվել է ականազերծման գործունեությունում:
«Ինչպես պարզ երևում է Երևանի վարչությունից մեզ տրամադրված պատասխաններից, կոնկրետ այդ բնագավառում բյուրոյի գործունեությունն անմիջականորեն առնչվում է Հայաստանի և Ադրբեջանի միջև շարունակվող հակամարտությանը: Այդ ծրագրային գործունեության շրջանակում Բյուրոն ընդլայնում է աջակցությունը Հայաստանի հումանիտար ականազերծման և փորձաքննության կենտրոնին: Ադրբեջանն իր սկզբունքային դիրքորոշումն է հայտնել նախագահությանը, հայտարարելով, որ վարչության ծրագրային գործունեությանն առնչվող սակրավորները պետք է անհրաժեշտ սրբագրումներ կատարեն վարչության հաջորդ տարվա գործունեությունում, ինչը կարևոր քայլ կլինի ԵԱՀԿ մասնակից բոլոր պետությունների կողմից ԵԱՀԿ Երևանի բյուրոյին հավաքական աջակցության ապահովման ճանապարհին: Մենք ելնում ենք այն ըմբռնումից, որ ԵԱՀԿ բոլոր առաքերությունները տեղերում պետք է գործեն ԵԱՀԿ սկզբունքներին համապատասխան և ոչ մի կերպ չպետք է վնասեն մասնակից մյուս պետությունների օրինական շահերին: Սակայն գերմանական և ավստրիական նախագահությունների հետ ինտենսիվ խորհրդատվությունները չտվեցին արդյունք, որը կփարատեր ադրբեջանական կողմի մտահոգությունը: Որպես ստեղծված իրավիճակից ելք` մենք համաձայնեցինք երկու նախագահությունների այն առաջարկությանը, որ իրենք իրականացնեն ԵԱՀԿ Երևանի առաքելության համատեղ քաղաքական ղեկավարումը, նրան հանձնարարելով դադարեցնել ականազերծմանն առնչվող իր գործունեությունը: Քանի որ ԵԱՀԿ գործունեությունը տեղերում և ինստիտուտներն ունեն միասնական բյուջե` մասնակից բոլոր պետությունների անդամավճարների հիման վրա, դրանց գործունեությունը պետք է լինի թափանցիկ մասնակից պետությունների համար: Դա կապահովեր թափանցիկություն ու հաշվետվողականություն և կկանխեր ապագայում այդ անցանկալի իրավիճակի կրկնական առաջացումը: Դժբախտաբար, տևական քննարկումներից հետո պարզ դարձավ, որ Հայաստանի դիրքորոշումն անհնար է դարձնում իրավիճակի հաղթահարումը: Ադրբեջանի պատվիրակությանն այլընտրանք չի մնում, բացի Երևանում ԵԱՀԿ բյուրոյի մանդատի գործողության ժամկետի երկարաձգման մասին որոշման նախագծին աջակցությունից հրաժարվելը», - ասվում է ԵԱՀԿ ադրբեջանական ներկայացուցչության հայտարարությունում:
Հիշեցնենք, որ ԵԱՀԿ երևանյան գրասենյակի գործունեությունը ժամանակավորապես հարցականի տակ է դրվել՝ նկատի ունենալով վերջինիս մանդատի երկարաձգման շուրջ փոխհամաձայնության բացակայությունը: Գոյություն ունեցող փորձի համաձայն, ազգային գրասենյակների գործունեության մանդատն ամեն տարի երկարաձգվում է՝ ԵԱՀԿ մասնակից երկրների փոխհամաձայնության հիման վրա: Ինչպես ԱրմԻնֆո-ին հայտնել են ԵԱՀԿ երևանյան գրասենյակում, ԵԱՀԿ նախագահությունը շարունակում է բանակցություններ վարել կազմակերպության մի շարք դաշտային առաքելությունների գործունեության մանդատի երկարաձգման ուղղությամբ շուտափույթ փոխհամաձայնության հասնելու հարցի շուրջ: «Մինչև մասնակից երկրների կողմից մանդատների երկարաձգման շուրջ փոխհամաձայնության ձեռք բերումը դաշտային առաքելությունները բաց կմնան և կշարունակեն վարչարարության և մանդատի հետ կապ չունեցող գործունեությունը: Քանի որ բանակցություններն այս պահին ընթացքի մեջ են, մենք չենք կարող ենթադրություններ անել դրանց վերաբերյալ»,- ասվում է կազմակերպության պատասխանում: ՀՀ ԱԳՆ մամուլի քարտուղար Տիգրան Բալայանն իր հերթին հաղորդել է, որ Հայաստանը սատարում է ԵԱՀԿ Երևանի գրասենյակի գործունեությանը և վերջինիս մշտապես աջակցություն է ցուցաբերում, մասնավորապես, ԵԱՀԿ-ում ընդունվող համապատասխան որոշումների շրջանակներում: Նա նշել է, որ Ադրբեջանի իշխանությունների կողմից Բաքվում ԵԱՀԿ գրասենյակի փակումից հետո, Երեւանի գրասենյակը հանդիսանում է ԵԱՀԿ միակ լիարժեք ներկայացուցչությունը Հարավային Կովկասում: Բալայանը փաստել է, որ Երեւանի գրասենյակի դերն արժեւորվում է ինչպես ԵԱՀԿ նախագահության, քարտուղարության, կազմակերպության այլ մարմինների, այնպես էլ մասնակից երկրների բացարձակ մեծամասնության կողմից` բացառությամբ մեկի: