Ադրբեջանի ԱԳՆ պաշտոնական ներկայացուցիչը մեկնաբանել է իրանական կողմի բողոքի նոտան

• Երեքշաբթի, 14 փետրվարի, 02:56

Երևան: 14.02.12: ԱրմԻնֆո: Անցած կիրակի Իրանի արտգործնախարարություն էր հրավիրվել Թեհրանում Ադրբեջանի դեսպան Ջավանշիր Ախունդովը, որտեղ նրանք բողոքի նոտա էին հանձնել:

IRNA գործակալության հաղորդման համաձայն, իրանական կողմն Ադրբեջանին մեղադրել է իսրայելական հետախուզության` ՙՄոսադի՚ հետ համագործակցության համար: Թեհրանը պնդում է, որ հենց ՙՄոսադի՚ գործակալներն են իրականացրել իրանցի գիտնական-միջուկագետների վերջին սպանությունները և հետո Իսրայել են մեկնել Ադրբեջանի տարածքով: Թեհրանը Բաքվից պահանջել է վերջ տալ իր տարածքի օգտագործմանն Իրանի դեմ գործողություններ անցկացնելու համար: Դեսպանը հայտարարել է, որ նոտան կհանձնի իր կառավարությանը:

Ինչպես հաղորդում է ՙԹուրան՚ գործակալությունը, Ադրբեջանի ԱԳՆ պաշտոնական ներկայացուցիչ Էլման Աբդուլաևը մեկնաբանել է իրանական կողմի բողոքի նոտան` այն որակելով ՙանհեթեթ, ստահոդ և մտացածին՚: Նրա ասելով, դա իրանական կողմի արձագանքն է օրեր առաջ Ադրբեջանի ներկայացրած բողոքի նոտային, որն առնչվում էր իրանական հատուկ ծառայությունների հետ կապ ունեցող անձանց ձերբակալությանը: Ադրբեջանի ԱԳՆ ներկայացուցչի ասելով, այդ անձինք առաջադրանք էին ստացել սպանել Բաքվի հրեական դպրոցի ուսուցիչներին: ՙԱդրբեջանն Իրանի հետ բարիդրացիական հարաբերությունների կողմնակից է: Սակայն Իրանի հատուկ ծառայությունների առնչությունը նման փաստերին ազդում է ադրբեջանաիրանական հարաբերությունների վրա՚, - հայտարարել է Աբդուլաևը: