ՙՍարդարապատ՚ շարժումը մտադիր է այլընտրանքային իշխանություն ստեղծել Հայաստանում

• Ուրբաթ, 27 հունվարի, 14:56

 ՙՍարդարապատ՚ շարժումը մտադիր է այլընտրանքային իշխանություն ստեղծել Հայաստանում: Հունվարի 27-ին լրագրողներին այդ մասին հայտարարիել է ՙՍարդարապատ՚ շարժման նախաձեռնող խմբի անդամ, ՙՇուշի՚ հատուկ գումարտակի  հրամանատար Ժիրայր Սեֆիլյանը:

Նրա համոզմամբ, երկրում նորմալ մթնոլորտի, ոչ թե ձևական, այլ իրական ժողովրդավարության հաստատումը հնարավոր է բնավ ոչ այնպիսի խորհրդարանական ընտրությունների միջոցով, որպիսիք իշխանությունները ցանկանում են անցկացնել մայիսին: ՙՆախ անհրաժեշտ է տապալել բռնապետական վարչակարգը, իչից հետո անցկացնել կարճատև անցումային, նախապատրաստական փուլ, և դրանից հետո միայն Հայաստանում հնարավոր կլինի ազատ ընտրությունների անցկացումը՚, - ասել է Սեֆիլյանն, ավելացնելով, որ նման ընտրություններին ՙՍարդարապատն՚, անշուշտ, կմասնակցի:

Նրա ասելով, քանի դեռ ընդդիմադիր և իշխանամետ քաղաքական ուժերը նախապատրաստվում են ՙմայիսյան ներկայացմանը՚, իրենց շարժումն զբաղված է այլընտրանքային իշխանության ձևավորմամբ և շատ շուտով կներկայացնի այլընտրանքային իշխանության հայեցակարգը, ինչպես նաև դրա կադրային բանկը: ՙԻսկ առաջիկա ընտրություններին մասնակցելու հայտ ներկայացրած մյուս քաղաքական ուժերին, այդ թվում` ընդդիմադիր, այլ բան չի մնում անել` քան ընտրություններին մասնակցելը: Եվ դրանով իսկ բոլոր այդ խամաճիկային ուժերը դառնում են ներկա վարչակազմի աջակիցը` օրինականացնելով դրա վերարտադրությունը՚, - հայտարարել է Ժիրայր Սեֆիլյանը: