Եվրամիության պատժամիջոցներն առաջին հերթին կհարվածեն ոչ թե Իրանին, այլ Եվրոպայի առավել թույլ երկրներին: ԱրմԻնֆո-ին այդպիսի կարծիք է հայտնել Հայաստանի Քաղաքական հետազոտությունների ինստիտուտի տարածաշրջանային հարցերի գծով փորձագետ Սերգեյ Շաքարյանցը`ԱրմԻնֆո-ին մեկնաբանելով հուլիսի 1-ից Իրանից նավթի և նավթամթերքի ներմուծման էմբարգո կիրառելու վերաբերյալ Եվրամիության նախօրեին ընդունած որոշումը:

ՙԲոլոր այդ երկրներին, օրինակ`այսօր էժան էներգակիրների խիստ կարիք ունեցող Հունաստանին, համոզել են համաձայնել Իրանի նկատմամբ միջոցների փաթեթի ընդունմանը, որպեսզի ներկայացնեն այն որպես Եվրամիության միասնական դիրքորոշում: Մինչդեռ Եվրամիություն մատակարարումները չեն գերազանցում Իրանի ընդհանուր նավթային արտահանման 20%-ը: Հետևաբար, այդ միջոցները խիստ փորձություն չեն դառնա իրանական տնտեսության համար, առավել ևս Թեհրանին չեն դրդի միջուկային ծրագրի հետ կապված կապիտուլյացիայի տարրեր պարունակող ինչ-որ քայլերի՚,- նշել է նա: Փորձագետի կարծիքով, Իսլամական Հանրապետությունն արդեն վաղուց էներգակիրների իր հիմնական արտահանման հոսքերը վերակողմնորոշել է դեպի Չինաստան, Հարավային Կորեա և Ճապոնիա, որոնք փաստորեն արդեն հրաժարվել են միանալ ԱՄՆ-ի և ԵՄ պատժամիջոցներին, ինչի հետևանքով նոր պատժամիջոցների միջոցով Իրանի ճնշման քաղաքականությունը լիովին ձախողվել է:

ԱՄՆ Էներգետիկ անվտանգության վարչության տվյալներով, իրանական նավթի և գազի հիմնական ներմուծողը Չինաստանն է, որին բաժին է ընկնում էներգակիրների իրանական արտահանման 22%-ը: Ճապոնիան ներկրում է 14%, Հնդկաստանը`13%, Հարավային Կորեան` 10%, Թուրքիան` 7%, ՀԱՀ-ը` 4%, Շրի-Լանկան` 2%, Թայվանը` 1%. ԵՄ-ին բաժին է ընկնում իրանական նավթի արտահանման 18% -ը:

Ավելին, Շաքարյանցի կարծիքով, ԱՄՆ և Եվրոպայի նման քայլերը հակառակ էֆեկտի կհանգեցնեն, ինչի վկայությունն իրենց միջև առևտրում դոլարային հաշվարկից հրաժարվելու Ճապոնիայի, Չինաստանի, Ռուսաստանի և Հնդկաստանի մտադրությունն է: Փորձագետի խոսքով, արևելքում արդեն ձևավորվում է հակադոլարային գոտի, որը որոշակի հավակնություններ ունի: Չինաստանը և Ճապոնիան արդեն հրաժարվել են դոլարից իրենց միջև հաշվարկներում, և շատ շուտով նրանց օրինակին կհետևեն Հնդկաստանը և Ռուսաստանը, ինչն այնքան էլ լավ չի անդրադառնա ԱՄՆ տնտեսության վրա: Տնտեսության աճի տեմպերով Չինաստանը, Ռուսաստանը և Հնդկաստանն առաջին տեղերն են զբաղեցնում աշխարհում, նրանցից ոչ հեռու գտնվում է Իրանը, և հենց այդ երկրներն են հանդիսանում Իրանի նկատմամբ ԱՄՆ գործողությունների հզոր հակակշիռը: ՙՏարիօրինակ է այն, որ այս քաղաքական խոշոր խաղին մասնակցում է, կարծես թե, Արևմուտքը ներկայացնող Ճապոնիան, որը ոչ միայն հրաժարվել է միանալ Իրանի նկատմամբ պատժամիջոցների ամբողջական փաթեթին, այլև հաստատել է իրանական նավթի և գազի գնման իր մտադրությունը՚,- ամփոփել է Շաքարյանցը: Մինչդեռ նավթի գները համաշխարհային շուկաներում բարձրացել են Իրանից նավթի մատակարարումների արգելք մտցնելու Եվրամիության որոշումից հետո: