ԵՄ-ն որոշել է Հայաստանի հետ խոր և համապարփակ ազատ առևտրի գոտու ստեղծման շուրջ բանակցությունները սկսել` Հայաստանի տնտեսական աճի զարգացմանն ու երկիր ներդրումների հոսքին նպաստելու նպատակով: Այդ մասին ասվում է Եվրոպական հարևանության քաղաքականության տեղեկատվական կենտրոնի հաղորդագրության մեջ:

ՙԱզատ առևտրի գոտու ստեղծման շուրջ բանակցությունների մեկնարկը կնշանավորի Հայաստանի հետ մեր առևտրային հարաբերությունների շրջադարձային կետը՚, - հայտարարել է ԵՄ առևտրի հարցերով հանձնակատար Կարել դե Գուխտը: Բանակցությունների ընթացքում կշոշափվեն ժամանակակից, թափանցիկ և կանխատեսելի ներդրումային և առևտրային մթնոլորտի ստեղծման հարցեր: Դրանք կշոշափեն ոչ միայն շուկա մուտքի պայմանները, այլև` կարգավորող մարմնի վերափոխումը, ինչն, արդյունքում, կնպաստի Հայաստանի և ԵՄ միջև առավել սերտ տնտեսական ինտեգրմանը:

ՙՄենք մտնում ենք մի նոր փուլ, որը կբերի տնտեսական կապերի նոր, ավելի հավակնոտ մակարդակի: ԵՄ-ն հանդիսանում է Հայաստանի առաջին առևտրային գործընկերը, և ազատ առևտրի գոտու ստեղծումը Հայաստանի համար կապահովի առավել շահավետ մուտք միասնական եվրոպական շուկա, ինչը կնպաստի երկրի տնտեսությանը՚, - ընդգծել է Գուխտը: Նա ավելացրել է, որ Հայաստանը պետք է շարունակի աշխատանքը կայուն, թափանցիկ և կանխատեսելի տնտեսական մթնոլրոտի հասնելու ուղղությամբ: ՙԴա կարևոր է օտարերկրյա ուղիղ ներդրումներ ներգրավելու համար, ինչը կանդրադառնա լրացուցիչ աշխատատեղերի ստեղծման և երկարաժամկետ աճի վրա՚, - նշել է եվրահանձնակատարը:

Եվրամիության Հարևանության քաղաքականության և ընդլայնման հարցերով գլխավոր հանձնակատար Ստեֆան Ֆյուլեն իր հերթին նշել է. ՙՍա հետագա քայլ է մեր քաղաքական և տնտեսական կապերի ամրապնդման գործում: Ազատ առևտրի գոտու ստեղծման շուրջ բանակցությունների սկիզբը սերտ տնտեսական ինտեգրմանն ուղղված քայլ է, ինչն անկյունաքար է Եվրոպական գործընկերության երկրների հետ մեր հարաբերություններում՚:

Հաղորդագրության մեջ նշվում է, որ երկկողմ առևտրային հարաբերությունները 2011 թվականին հասել են 960 մլն եվրոյի: Ներկայում կողմերը քննարկում են բանակցությունների առաջին փուլի նախապատրաստումը, որը կսկսվի մոտ ապագայում: