Թեղուտի տարածքում գտնվող պատմական հուշարձանները վտանգված են

• Հինգշաբթի, 26 հունվարի, 18:01

Թեղուտի հանքավայրը կարող է վտանգել մ.թ.ա. 28-րդ դարի պատկանող պատմության հնագույն հուշարձանը:

Ինչպես այսօր մամլո ասուլիսի ժամանակ պատմել է Թեղուտի հնագիտական արշավախմբի ղեկավար Սուրեն Հոբոսյանը, պոչամբարի տարածքում հայտնաբերվել է հնամյա պատ, որը կարող է պատկանել
հնագույն արտադրական ձեռնարկության: Հնագետների կողմից պեղված պատի երկարությունը կազմում է 17.5 մետր, իսկ բարձրությունը`1.3 մետր:

Խնդիրն այն է, որ այդ տարածքում նախատեսվում է կառուցել Թեղուտի հանքավայրի պոչամբարը: Այդպիսով, հնագույն հուշարձանը կարող է անդառնալի կորչել: Հնագետի խոսքով, պատն անհնար է տեղափոխել այլ վայր: ՙԱպագա պոչամբարի տարածքում գտնվում է նաև միջնադարյան եկեղեցի: Այն, ի տարբերություն պատի, տեղափոխվելու է այլ վայր`Շնող գյուղի մոտ՚,- պատմել է նա:

Ընդհանուր առմամբ Թեղուտի տարածքում հայտնաբերվել են վաղ բրոնզի դարաշրջանին պատկանող մի քանի տասնյակ հնագույն հուշարձաններ: Բացի այդ, հայտնաբերվել է միջնադարյան ձուլարան, որը վկայում է այն մասին, որ հանքավայրից օգտնվել են դեռ հարյուրավոր տարիներ առաջ:

Հասարակական կազմակերպությունները Թեղուտի հանքավայրի շահագործման դեմ ակտիվ պայքար են մղում`2007 թվականից սկսած: Բնապահպանների կարծիքով, հանքավայրի շահագործումը ոչ միայն կործանարար կլինի էկոլոգիայի համար /նախատեսվում է հատել 357 հա անտառ/, այլև բացասական ազդեցություն կունենան մոտակա բնակավայրերի բնակիչների առողջության համար: